Chak lo mah se a chung berah Arsenal

Ningani zan Europa League inkhelah Arsenal chu Cologne lakah 1-0 in an tlawm a, Group H inkhel dangah Red Star Belgrade leh Bate Borisov te goal awm loa an inhnehtawk avangin Gunners hi hmahruaitu an ni tlang dawn tih a chiang tawh tho.

Germany a zin chhuak Arsenal-in first team player an chhawr lo, match hmasa lam ang bawkin Premier League match khel ṭhang player zingah inkhel bulṭan an awm lo. Midfielder Francis Coquelin-a'n goal ban a pet per bakah a hun ṭha neih hmasa zawk chu goal ban hrulah a thlawh liam bawk.

Arsenal defender Mathieu Debuchy-a penalty chawi chu Sehrou Guirassy-a'n goal-ah a chantir a, goal dang a lut tawh lo. Cologne hian season duhawm lo an hmang mek, Bundesliga match 12 an khelhah chakni hmel an la hmu lo a, Europa league round match nga an khelhah vawi hnih an chakna chiah a ni.

Chak lo mah se

Arsenal manager Arsene Wenger chuan chak lo mah se match khat khelh hmabak nei chunga group hmahruaitu an nih chian tawh avangin an tum ram an thlen thu a sawi chhuak. Arsenal hian point 10 an hmu a, an hnuaia awm Cologne, Red Star Belgrade leh Bate Borisov ten Gunners hnungzuia knockout round luh beiseina an la nei vek thung.

Gunners manager Wenger chuan, "Group hmahruaitu kan nih avangin hna kan thawk ṭha thawkhatah ka ngai. Kan match hnuhnung ber chu kan khelmualah Bate Borisov nen kan khel dawn a, hnehna chan leh ngei kan tum ang," a ti.

Tun season chhungin Wenger hian inelna hrang hrangah a naute vawi nga a tlawmpuina chiah a ni a, tun ṭuma an chak loh erawh knockout round lut chiang tawh an nih avangin ṭum dang nen chuan a boruak a inang lo.

Hmabak

Season hmasa khan Arsenal hi Premier League-ah pangana an nih avangin Wenger-a'n a enkawl china a vawi khat nan Champions League an khel phak lo. French manager hian inlena zawng zawng ngai pawimawh vek mah se league chu an dahsan ber a nih thu a sawi fo tawh.

Gunners hian an league match hnuhnung berah Tottenhman 2-0 in an hneh a, Spurs hnehtu player-te Germany lamah hruai an nih ve loh avangin Pathianni zan dar 7:30-a Burnley an lenchilh hunah an ṭhat dan berin an inrem leh thei ang.

Everton an mualpho

Premier League-ah beisei an phak lo a, Europa League pawh Everton tan chuan mualpho zualna mai a ni. Ningani zan inkhelah Everton chu an khelmual Goodison Park-ah ngei mai an mikhual Atalanta chuan 5-1 ngawtin an va mualpho.

Toffees hi tla chiang tawh ni mah se manager lailawk David Unsworth-a'n Wayne Rooney, Kevin Mirallas leh Ashley Williams te a khelhtir a, an khel ṭha lo vek. Italian club hian midfielder Bryan Cristante leh Danish striker Andreas Cornelius te goal hnih bakah substitute Robin Gosens te hmangin goal an khung a, Everton tana Sandro Ramirez chuan an mualpho lutuk tur a khuh phak lo.

Premier League table-a 16-na dinhmun luahtu Everton hian Pathianni zan dar 7:00-ah Southampton an lenchilh ang.

Astana 2 - 3 Villarreal
Lugano 1 - 0 Hapoel Be'er Sheva
Viktoria Plzen 2 - 0 FCSB
Ostersunds FK 2 - 0 Zorya
Athletic Club 3 - 2 Hertha BSC
BATE 0 - 0 Crvena Zvezda
Cologne 1 - 0 Arsenal
Konyaspor 1 - 1 Marseille
Salzburg 0 - 1 Vitoria Guimaraes
Nice 3 - 1 Zulte-Waregem
Lazio 1 - 1 Vitesse
Zenit 2 - 1 Vardar
Rosenborg 0 - 1 Real Sociedad
Lokomotiv Moskva 2 - 1 Kobenhavn
Maccabi Tel Aviv 0 - 2 Slavia Praha
Skenderbeu Korce 3 - 2 Dynamo Kiev
Partizan 2 - 1 Young Boys
Milan 5 - 1 Austria Wien
AEK Athens 2 - 2 Rijeka
Everton 1 - 5 Atalanta
Olympique Lyon 4 - 0 Apollon
Sporting Braga 3 - 1 Hoffenheim
Ludogorets 1 - 2 Istanbul Basak
Sheriff 1 - 0 Zlin