Carvajal hrem mai thei

Real Madrid defender Dani Carvajal chu tum reng vanga yellow card hmu luiah puh a ni a, puh a nihna hi a dik a nih chuan UEFA chuan match khat dang an hrem belh ang. Real hian Thawhlehni zan khan Champions League group stage match-ah Apoel Nicosia chu 6-0 ngawtin an sawp a, last 16 an lut chiang.

Carvajal hian last 16 an luh chian tawh tho avangin awmze nei lo an match hnuhnung ber pumpelh nan yellow card hi a hmu luiah ngaih a ni. Real player zingah match pawimawh nia lang lo pumpelh nana card hmuh luih hi thil thar a ni lo. Kum 2010 khan Xabi Alonso leh Sergio Ramos chu Ajax laka 4-0 a an tlawm ṭumin hnawhchhuah an lo ni tawh a, Auxerre nena an inkhel pumpelh tum vang a ni.

Player pahnih hi match dang hrem ni lo mah se £16,700 ve ve chawitir an ni a, hetihlaia Real boss Jose Mourinho chu goalkeeper Iker Casillas leh reserve Jerzy Dudek kaltlanga a player te pahnih thu pea hriat a nih avangin match khat hrem a ni a, keeper pahnih hi pawisa chawitir an ni bawk.

La Liga lama beisei phak lo Real Madrid hian zanin dar 8:45-ah Malaga an lenchilh dawn a, table hmahruaitu Barcelona thlah fal lutuk lo turin zaninah chak ngei an mamawh ang.