Football inelna ropui World Cup a thleng dawn ta
Football ngaintuten 'The Greatest Show on Earth' ti hiala an sawi ṭhin FIFA World Cup chu November 20, Pathianni zan dar 9:30 aṭangin khelh ṭan a ni dawn a, opening ceremony chu dar 7:30 aṭangin an ṭan ang.
Opening match-ah hian inelna thlengtu Qatar leh Ecuador te Al Bayt Stadium, Al Khor-ah an inhmachhawn dawn. Group A-ah hian Qatar leh Ecuardor bakah Senegal leh Netherlands te an awm a, November 21, Thawhṭanni zan dar 9:30-ah African champion leh Oranje te hi an inkhel thung ang.
World Cup-a hian khawmualpui paruk aṭangin ram 32 an tel a, Asia khawmualpuiin team ruk ngawt a thawh. Qatar-in inelna an thlen bakah Australia-in playoff-ah South America aiawh Peru an hneh avangin kum dang zawng aiin Asian team an tam.
Chutihrualin champion rinkai zingah Asia an tel pha lo a, South America leh Europe aiawh aṭang bawkin champion awm leh tura ngaih a ni. Inkhel hmasa ber tur Qatar hi inelna thlengtu ni lo se World Cup an inpettlin theih a rinawm a, kumin hi World Cup an khelh hmasak ber tur
a ni bawk.
Amaherawhchu, Qatar hi inelna thlengtu an nih miau avangin seeded an ni a, an khingpui Ecuador hi tun inelnaa mit la zingah an tel pha lo. World Cup-ah erawh Ecuador hi an mikhual bik lo a, kum 2002 leh 2006 te khan an lo inpettling tawh.
World Cup qualifier-ah Ecuador hi palina an ni a, FIFA ranking-ah phei chuan 44-na niin, an khingpui tur Qatar (50) aia an sanna a tam lo. Ecuador hian Premier League, Bundesliga, La Liga leh Ligue 1 vela khel an kawl ve nuk a, Qatar erawh an ram club-a khel vek an ni thung.
Ecuador hi chak tura buk rit zawk ni mah se an match hnuhnung pathumah Asia ram pathum Ecuador, Japan leh Saudi Arabia te an hmachhawn a, goal awm lo vekin an inhnehtawk. Match thum chhung pet goal tawh lo Ecuador-in pet goal-tu an mamawh a, Qatar pawhin mahni muala result ṭha an duh chuan Ecuador hi an hneh hmasak a ṭul.
World Cup thlengtu an che ṭha ṭhin a, South Africa (2010) chauhin group stage an paltlang lo, chutihrualin point li an hmu tal. Qatar hi inelna thlengtu zinga record nei chhe ber ni thei dinhmunah an ding.
FIFA World Cup TV hmanga en theihna:
Sports 18
Zonet: Thla khat lak man hi Rs 15 a ni a, thla hnih chhung la nghalin Rs 30 an chawi ang.
LPS: Nimin aṭangin Sports 18 an tinung ṭan a, channel thuneitu lamin ni hnih an belh bawk avangin World Cup final thleng a daih dawn. Subscriber-ten Rs 15 chauh an chawi ang.
Online hmanga enna
JioCinema app hmangin a thlawnin a en theih dawn. Desktop leh Laptop hmanga en tur tan JioCinema website www.jiocinema.com ah a en theih ang.
Voot hmangin World Cup hi en theih a ni dawn bawk. Voot subscribe man hi Mobile - Rs 299 (kum khat), Gold - Rs 499 (kum khat, screen hnih aṭangin a en theih) leh Platinum Rs 599 (kum khat, screen pali aṭangin a en theih)
Zonet Xtra
World Cup chungchang thlirlawkna leh thlirletna chu Zonet-ah neih ṭhin a ni dawn a, Zonet World Cup Xtra hi group stage chin chu Rihnimah pek chhuah a ni ang a, knockout stage aṭangin Zawlbuk-ah en theih ang. Online hmanga en duh tan Zonet Empai hmangin a en theih ang.