Hneh theih loha ding nghet Sangliana

Lalsangliana, a hming ringawt pawh hi mi tam tak tan chuan a nelawm loh nghal. Mahse, pa inngaitlawm leh thuhnuairawlh tak a ni lawi si - Upper Republic tlangval hian, a tiatpui Mizo inchai chak zingah amah elphak a tawng lo.

Sangliana hian amah chotu Lalnunfela chu thawh sawm (round 10) an inbeih chhungin bawhbet lo mah se, round 10 zinga round kuaah a chungnung zawk. Round hnuhnung ber dawtah an pahnihin point an hmu lo, a dang zawngah Mizo Inchai Palian champion lai Sangliana a chungnung vek.

Round kua aṭangin Sangliana'n point 20 a hlawh chhuak a, a khingpui Fela'n point a hlawh chhuak ve lo. Rin bial aṭanga nawr chhuah leh, hnung lam aṭanga pawm beh chu Sangliana point hlawhchhuah dan tlangpui a ni.

Hneh theih loh
Lalsangliana hian kum 2014 khan Lalnunfela hnen aṭang hian Mizo inchai palian title hi a laksak a, a hnu lamah tumahin a kawnghren hren lai hi an la chhuhsak thei lo - kum riat chhung chu Mizoram champion a ni tihna a ni.

Inchai hma khan, 5ft 11in a sang Sangliana hian, "Ka inchai peih chhung chu title hi hum ka tum ang," tiin a lo sawi tawh, a sawi ang ngeiin a hum thei dawn niin a lang, inbuatsaihna a neih ṭhat ṭhin avangin a hmaa ding apiang a hneh zel.

Mizo palian title fight hi 2016 khan neih a ni a, hemi ṭum hian Fela leh Sangliana inhmachhawn tur an ni. Mahse, Fela a inhnukdawk a, hun tepter tawh takah PB Lalnienga a inlan a, a chak lo - tun ṭumah Fela nen an inhmachhawn leh ta a ni.

Hranghlui Vanlalduata kha kum 15 chhung Mizoram champion a ni thei, tuna champion lai Lalsangliana hi kum riat chhung a champion tawh a, amah hi kum 31 mi chauh a la nih avangin title kawl rei ber record a khum thei a, hun erawh a la mamawh hnem dawn.

Sangliana a lawm
Sangliana hi Excise & Narcotics tana thawk lai a ni a, inchai a hmachhawn theih nan hian kawng hawnsak a ni. Sangliana chuan, "Ka thawhna department chungah ka lawm, a bik takin min tuipuia hma min laksaktu commissioner Ngurchungnunga chungah ka lawm.

"Voltas Malsawm House ten min sponsor a, inchai a hlawhtlin theih chhan pakhat an ni. Kan veng mipui leh hmun hrang hrang min ṭantuten min ṭawngṭai pui bawk a, an chungah ka lawm hle bawk a ni," tiin Vanglaini a hrilh.

Sangliana bakah, palaihawl champion Remruatpuia, nulian champion Lalhmangaihsangi leh hun rei tak chhung pate champion lo ni tawh Lalchhanhima te khan Elite Gym, Vaivakawn leh Rebel Gym, Mission Vengah training an nei ṭhin, an chungah lawmthu an sawi bawk.

Hmanlai aṭangin Mizo ten inchai/inbuan kan ngaisang a, kan hnam infiamna ngaihhlut zinga mi a nih avangin kan thisenin a ṭhan hnan. Mizoram Wrestling Association leh Zonet ten an tharthawh thei hi a lawmawm, chutihrualin tun aia ropui zawka buatsaih theih erawh a nih a rinawm.

Palian Title Fight
Round 1: Sangliana'n vawi thum a nawr chhuak a, titluin a bawh zui a, Fela inveng mah se point khat a hmu thei tho. Fela'n bawhbeh theihna remchang a nei, mahse a kuai zangthal zo lo. (Sangliana 4-0 Fela)
Round 2: Sangliana'n vawi khat a nawr chhuak.
(Sangliana 1-0 Fela)
Round 3: Sangliana'n vawi hnih a nawr chhuak a, a khingpui a ṭhingṭhit laiin Sangliana'n hnung lam aṭangin a pawm bet. (Sangliana 3-0)
Round 4: Vawi thum ngawt Sangliana'n a nawr chhuak a, a khingpui a paih tlu bawk. (Sangliana 4-0)
Round 5: Sangliana'n vawi thum bawk a nawr chhuak, a khingpui a ṭhingṭhit laiin hnung lam aṭangin a man bet bawk. (Sangliana 4-0 Fela)
Round 6: Vawi khat Sangliana'n a nawr chhuak.
(Sangliana 1-0 Fela)
Round 7: Sanglaina'n a kuai tlu a, mahse a bawhbet lo. Amaherawhchu, a ṭhingṭhit laiin hnung lam aṭangin a man bet. (Sangliana 1-0 Fela)
Round 8: Fela'n remchang nei mah se a nawr chhuak zo lo. Sangliana bawkin a nawr chhuak. (Sangliana 1-0 Fela)
Round 9: Wrestler pahnih an inveng tawn a, round kuana bikah an pahnihin point an hmu lo.
Round 10: Sangliana'n hnuai lam aṭangin put kan a tum a, a pu fuh hman. Mahse, Fela'n Sangliana ke a man bet tlat a, point a pe duh bik lo. A put loh hnuah bawh zuiin point khat a hlawh chhuak. (Sangliana 1-0 Fela)