MPL Judgement Day Semifinal lut tur leh tla tur

Honda MPL9 chu vawiin hian league round khelh zawh a ni dawn a, RG Stadium-ah match li en tur a awm ang. Aizawl FC, FC Venghnuai leh Chhinga Veng FC ten semifinal an lut tawh. Mizoram Police leh Chawnpui FC ten hmunruak pakhat an inchuh dawn.

Chawhma dar 11:00-ah Chhinga Veng leh FC Venghnuai te an inkhel ang a, hei hi chu semifinal inchuhna a ni tawh lo mah se table-a an awmna tur a hrilh dawn. Tlai dar 1:30-ah Chanwpui FC leh Mizoram Police te an inkhel dawn a, team pahniha pakhat zawkin semifinal an lut dawn. MPL-ah Police an la champion ngai lo a, an hun ṭha an bawhpelh chuan MPL10 an nghah leh a ngai ang.

Tlai dar 4:00-ah Aizawl FC leh Electric Veng an inkhel dawn a, EFC hi an chak lo a nih chuan relegation playoff khelh dan a la awm avangin chak a pawimawh. Zanin dar 7:00-ah inkhel pawimawh bik hmuh tur a awm dawn. Chanmari FC leh MPL kaithar an inkhel ang a, Chanmarians hian hnehna an chang lo a nih chuan an relegate ang.