I League champion lakah Aizawl FC an tlawm

Nimin khan Aizawl FC-in tun I League atana an match hnihna an khel a, RG Stadium-ah champion lai Gokulam Kerala 1-0 in an hneh lo. Kerala club tana chakna goal hi minute 87-naah subtitute Thahir Zaman-a khung a ni.

Mizo club-in I League-ah bul an ṭan ṭha tawk lo a, match hmasa berah Trau nen 1-1 in an inhnehtawk. I League champion-in season tharah Indian Super League an khelh dawn avangin Aizawl FC tan champion nomawi chawi turin Gokulam laka point thum hlawhchhuah a pawimawh a, amaherawhchu point an hlawhchhuah loh avangin match hnih lek aṭangin champion a harsa dawn tih a lang.

AFC coach Standly Rozario-a'n Gokulam lakah point hlawhchhuah ngei tumin centre back-ah foreigner a chhawr a, captain Lalchhawnkima bakah Lalmuanawma (Munez) te bench-ah an awm. Team pahnih an fimkhur avangin goal chance a tam lo.

Mizo club-in champion lai Gokulam lakah point hlu tak an hlawh chhuak tura ngaih hnuah Arjun Jayaraj cross chu Thahir Zaman-a'n a tauh goal. Aizawl FC defender palian Emmanuel Makinde-a'n ball kal dan a chhut fuh tawk lo a, Mizo club-in match hnih aṭangin point khat chauh an hlawh chhuak.

Aizawl FC hian November 21, Thawhṭanni hian Sudeva Delhi an mikhual leh dawn a, hemi zawh aṭang hian khualmualah an khel ṭan ang. November 28, Thawhṭanni hian Tau Devi Lal Football Stadium, Gurgaon-ah Mizo tamna RoundGlass Punjab an hmachawn ang