Chanmari hmaa ding tur Bethlehem

Tualchhung football ngaina chin tan chuan zanin hi Mizoram football history-ah a pawimawh tih an hrethiam pha ang. Mizoram Premier League ṭantirh aṭanga team ṭha pawl ni cho ngar ngar Chanmari FC chu relegate thei dinhmunah an ding a, coach K. Malsawmkima'n a chhan chhuak thei ang em tih zawhna chu zaninah chhanin a awm ang.

Zanin dar 7:00 hian Chanmari FC leh FC Bethlehem an inkhel dawn a, dinhmun chhe zawka ding chu Chanmarians hi an ni. MPL vawi hnih ngawt champion tawh team tan MPL-a inhamtang turin chak ngei ngei an mamawh a, MPL kaithar tan draw a tawk.

Covid-19 in tualchhung football-ah nghawng lian tak a nei a, season hnih ngawt MPL khelh a nih loh avangin tualchhung player ṭha ṭhin ṭhenkhat an chawl hman. MPL club-te pawhin player ṭha leh ṭha lo thliar thiam har an ti a, Chanmari chetsualna pawh hi khelmual chhunga inṭan chauh ni loin khelmual pawn aṭanga inṭan a ni.

MPL-a budget sang zinga tel pha Chanmariin an it zawng player ṭhenkhat chan mah se an duh zawng player ṭhahnem tak an chang. MPL club-in I League player Lalramchhullova leh Malsawmzuala te an lalut a, champion an tum tih a chiang.

Mahse, season tawp dawn meuhah chuan nomawi beisei team kha relegate thei dinhmunah an ding ta zawk. Chanmari hian Bethlehem hi 3-2 an hneh tawh a, MPL khelh zel beiseina sang tak an nei ang.

Chutihrualin Bethlehem hian Chanmari hi an inkhelh hmasa zawk angin an chung en tawh lo ang. A chhan chu 3-2 a an chak loh ṭum hian an goal bawh a na zawk a, an goal khung chu offside vangin pawm a ni lo. Zanin hian Bethlehem mipui an thawhchhuah ṭhat a rinawm a, Chanmari hian an vanglaiin ṭantu an ngah ṭhin a, mah se tun hi nomawi an beisei lai ang thoa ṭantu an mamawh hun chu a ni.