Mumbai chakna Apuia & Lianzuala

Ningani zan Indian Super League inkhelah Mumbai City chuan 4-0 in Bengaluru an sawp a, Mizo tlangval Lalengmawia (Apuia) leh Lallianzuala Chhangte ten goal khat ve ve an khung - anni bakah hian Jorge Diaz leh Bipin Singh-ten goal khat ve ve an khung bawk.

Argentine striker Jorge Diaz hian minute 14-na lekah goal hmahruai a khung a, minute 32-naah Apuia hun a inherchhuak thung - Vaivakawn tlangval hian Bipin Singh-a siamsak chu a duhthala a insiamrem hnuah an goal hnihna ni turin a khung.

Minute 58-na a ni a, Diaz bawk a inlar nawn - duh ni se, a goal hnihna khung theihna remchang a nei. Mahse, kum 32 mi striker hian Bipin tan a siamsak a, Manipur forward hian harsatna nei loin goal ruakah a khung.

Mumbai-in an la duhtawk lo cheu - Diaz-a ball pass chu Sandesh Jhingan chuan lo dang perin Lianzuala ke bulah tak a tla a, Lunglei forward hian ṭha zetin goal-ah a chantir a, Bengaluru an tho tawh lo.

Lianzuala hian tun season-ah match sarih a khelh aṭangin goal sarih a khung tawh a, Apuia tan tun season-a a goal hmasa ber a ni thung - Mumbai an chawl rih zui dawn a, November 25 zana NorthEast United an lenchilh hma chu an inlan rih lo ang.

Nizan khan East Bengal leh Odisha inkhelin, an result kan hre hman lo a, vawiin tlai dar 5:30-ah Chennaiyin chuan Jamshedpur an mikhual dawn thung - zan dar 7:30-ah hmahruaitu Hyderabad chuan Kerala Blasters an mikhual dawn bawk.

Pathianni zan dar 7:30-ah FC Goa chuan ATK Mohun Bagan an mikhual dawn a, Ningani zan thlen hma chu ISL match a awm zui lo ang.