Mizoram-Hoffenheim ticket an inchuh zo vek! Ticket chang lote hriatthiamna dilin Lammual pan lo turin MFA-in a ngen

Germany-ah pawh India pawisaa Rs 1,000-Rs 5,000 chuanga an inkhel an en ṭhin kha kan khelmualah Rs 500/- a en theih an ni dawn a, ticket an inchuh zo hi a mak lo.

May 13-a Mizoram XI leh Bundesliga club 1899 Hoffenheim-te Lammuala an inkhel enna tur ticket a zo vek tawh.

He inkhel enna ticket hi ni hnih pawh tling lovah hralh zawh vek a ni ta si a, Mizoram Football Association chuan inkhel enna ticket chang lote chu in lama TV atanga lo thlir a, Lammual lam pana kal lo mai turin a ngen a; khelmualin a la dawn zawh loh avangin ticket chang lote hriatthiamna a ngen bawk.

MFA chuan he inkhel tur chung­changah hetiang hian thuchhuah an siam bawk:

Inkhel enna ticket hi May 9 & 10-ah Aizawla hmun hrang hrangah zawrh chhuah a ni a; a ni khatnaah a zo deuh vek a, a ni hnihnaah darkar khat chhung velin ticket la awmte an inchuh zo vek tawh a ni.

Lammuala inkhel enna ticket hi Lammuala leng mawi tawk tur chiah siam a ni. Chair-a ṭhu turte chu an chair-ah number pek vek a ni a, chumi mil chuan ticket-ah number a inziak vek bawk a, chuvangin chair-a ṭhutnaah Rs 500/- man ticket nei lote tan ṭhut a remchang lo ang.

Lammual Tlanga ṭhu tura ticket neite pawh Lammual Tlanga leng zat tur chiah ticket siam a ni a, security lamin uluk taka an check-a an ven dawn avangin Rs 200/- man ticket lei lote tan Lammual Tlang pan a remchang dawn lo a ni.

Official pavillion, chair awmna gallery-te leh Lammual Tlang ni lo, hmun dang zawng hi Rs 100/- man ticket neite tan zuah a ni thung ang.

Mizoram Premier League Final inkhel entu aṭanga chhutin tun ṭum inkhel atana ticket siam hi 3,000 vel zetin a tlem zawk dawn a, hei hi Lammuala mipui innek buai nuai nuai lo tura ruahmanna siam vang leh, chair-a ṭhutnaah felfai taka mi pakhat zel an ṭhut a, a bulah midang din phal a nih dawn loh vang a ni. Hei hi Lammuala inkhel en a felfai a, a him zawk theihna tura tih a ni.

Lammuala inkhel hi chhawng hnih ang deuha ruahman a ni. Zan dar 7:00-ah entertainment programme-a bul ṭan tur a ni a, dar 8:00-ah kick off a ni ang. Hei vang hian tlai dar 5:30-ah Lammual Gate hawn tan a ni ang a, zan dar 7:30-ah chuan khar tawh tura tih a ni a, darkar hnih chhung gate hawn a ni ang.

Inkhel en turte chu zan dar 6:30-ah Lammual lut fel vek tawh tura ngen an ni. Hei hi entertainment programme ṭan dawna innek buai a awm lohna tura ruahman a ni.

Inkhel en turte hi Lammualah zu leh ruihhlo eng chi mah keng lut lo tura ngen an ni a, security duty lamin gate-ah an lo check vek ang. Gate-ah indap vek tur a nih dawn avangin a luh hun chhung hi a rei deuh mai thei a, chuvangin inkhel en tumte chu a hma thei anga Lammual pan tura ngen leh hriatiir an ni.

Chair-a ṭhutna tur ticket neite pawh seat number inziak vek mah se, a luh a buaithlak deuh dawn avangin hma taka kal a, zan dar 6:30-ah ṭhu fel hman tawh tura ngen an ni.

Ruahmanna a kal tluan chuan Germany club lian zinga mi Hoffenheim hian May 12-ah New Delhi an lo thleng ang a, May 13 chawhnu lamah Lengpui Airport an lo thleng ang.

MFA chuan Hoffenheim team hmuak tur hian ruahmanna fel tak a siam a, airport aṭangin a lo dawngsawngtu tur siam an ni a, ropui taka lo hmuah tum a ni. Mipui nawlpui Hoffenheim team lo hmuak duhte tan May 13 chawhnu dar 1:00-ah Lengpui Airport thlen ni se a ṭha ang.

He German team hian an player ṭha an rawn hruai vek dawn a, a lo kal thei lo awm chhunte chu mahni ram aiawha FIFA World Cup khel turte chiah an ni. Hei vang hian player-te mai bakah he club-a hotute an lo kal kim vek dawn a, Head coach-in a coaching staff zawng zawng a hruai kim vek dawn a, General Manager hoin an zavaiin mi 41 lo kal tura ruahman a ni.

Mizoram XI leh Hoffenheim inkhel turah hian mikhualte lawmna thuziak emaw, mahni veng/khaw player-te lawmna thuziak emaw tar duh tan MFA-in lammuala tar a phal a; nimahsela sumdawnna lam rawngkai erawh tar a remchang lo ang.

Football club emaw, mimalin emaw Lammualah an duhzawng thuziak hmangin Hoffenheim emaw Mizo player-te emaw an lawmna leh duhsakna thuziak an tar a thiang ang.

Hetihlai hian he inkhel hi Bundesliga lam duh dan angin branding pawh tihfel vek tur a ni a; Germany aṭanga sponsor nei fel thlap a nih angin anni lamin an duan sa thil lote chu inzawrhna lam rawngkai tar phal a ni lo thung.

Lammual area chhungah lirthei eng chi mah ken luh phal a ni lo. Team chuanna lirthei leh duty-te lirthei lo chu ken luh theih a ni lo ang.

Lammuala inkhel en tur, ke-a kal phakna hmuna awmte chu ke-a kal hram tura ngen an ni. Veng hla, lirtheia kal ngaite pawh Lammual gate aṭanga hla deuh taka lirthei hung tura ngen an ni.

Lammual bul hnaia lirthei dah vek kan tum chuan a hmunin a dawl dawn lo a, chuvangin Lammual thlen hma deuha lirthei dahnaah dah mai turin mipuite ngen an ni e.

MFA chuan Mizoram XI leh Hoffenheim inkhel tur atan hian hmun danga an tih angin photographer leh press mi koh bik an nei a; state dang leh ram danga an tih angin heng mite tan hian he inkhelah hian Media Accreditation an pe. Card pawh a hranpaa siamsak an ni a, ṭhutna pawh an nei hrang ang.

He inkhel cover tur hian chanchinbu, internet leh TV lama sports chanchin ziaktu/puangtute bik chu Media Accreditation pek an ni a, anni hi ṭhutna hranpa siamsak an ni a, an card-ah an ṭhutna tur hi tarlan vek a ni. Inkhelh banah Post Match Press Conference-ah an tel nghal thei ang.

Photographer pawh 'Official Photographer' a hranpaa ruat an ni a, anni pawh hian card an dawng vek a, hetiang mi ni lem lote tan chuan khelmual chhunga thlalak hi a remchang dawn lo. Hei hi ram dang leh hmun danga an tih dan a ni a, thil a felfai zawkna tur leh khelmual chhungah hmelhriat loh photographer an luh loh a, security a 

ṭhat zawkna tura duan a ni.

Lammuala Mizoram XI leh Hoffenheim inkhel hi TV-ah live-a pek chhuah a ni ang. Mizoramah chuan Zonet TV-in live-in an pe chhuak ang a, Zonet TV-in satellite-a an pek chhuah hi India ram pum en theihin Doordharshan Sports-in an pe chhawng bawk ang. He thilah hian Hoffenheim lo zin tur buaipuitu Adamant Sports lam chuan New Delhi-a DDK hmunpuiah thil tihfel tur an tifel tawh.

Hoffenheim lo zin tur hi Bundesliga official tour programme a ni. Bundesliga dan angin an zin chhuahna hi satellite-a live-a pek chhuah ngei tur a ni. Zonet TV lamin thla an la ang a, hei hi Germany lamin an en theihna turin Bundesliga lamin an la chhawng ve leh bawk ang a, Bundesliga Youtube Channel-ah an dah ang. Hengte hi Germany-a football league thuneitu sang Deutsche Fußball Liga (DFL) lamin an club an zin chhuah dawna dan an zam sa a ni.

Inkhel hi dar 8:00-ah ṭan a ni dawn a, DD Sports-ah erawh news puan nen a innan dawn avangin zan dar 9:00 aṭangin deferred live-in an pe chhuak thung ang.

Inkhel tluang taka kalpui a nih theihna tur leh, Germany lam mikhualte tluang taka an lo thlen theihna turin Mizo mipuite ṭawngṭaina MFA chuan a ngen bawk a ni.

I ticket lei kha en chiang la, i ṭhut­na tur mai bakah luhna tur gate thlengin a inziak vek ang. I ṭhutna tur pawh an kawhhmuh thei vek ang che.

Rs 100/- man ticket lei tan Lammual Tlang, official pavillion leh chair awmna stand ni lo a bak zawngah a awm theih ang, ticket rawng hi violet a ni.

Lammual Tlanga ṭhu turte chuan ticket rawng sen an chang vek a, main gate lam aṭanga luh tur a ni. He ticket leitute hi chu Lammual Tlang ni lo hmun danga an ṭhut a rem lo ang.

Chair-a ṭhu turte pawh in ticket azirin in luhna leh chhuahna, in ṭhutna tur a inang lo. S Mal­sawm­tluanga Stand hi Venghlui lam hnaih goal hnung hi a ni a, he ta ṭhu turte ticket rawng chu a eng (yellow) a ni. I ticket-a inziak ni lo hmun dangah, 'A remchang em a, ka ṭhiante ka zui mai...,'i ti thei lo ang. I ticket-a seat inziakah chiah i ṭhut a ngai.

Bethlehem Veng hnaih lama ṭhut­na dah hi K Kawla Stand a ni. Helai hmuna ṭhu turte chuan ticket rawng pawl (blue) an neih ngei a ngai a; main gate aṭanga luh tur a ni.

Tuithiang Veng hnaih lamah Zo­muanthanga Stand a awm leh a, he hmuna ṭhu turte ticket hi chu rawng var (white) a ni a, Gate No. 2 (Hotel Ritz kawt) aṭanga luh tur a ni. AR Cinema Hall hlui hnaih lam goal hnungah Zohminga Zote Stand siam a ni a, heta ṭhu turte ticket chu rawng hring (green) a ni a, a luhna pawh Gate No. 2 tho a ni.

Zohminga Zote Stand sir, tlang lam hnaiah hian chair 124 awmna, Stand No. 6 a awm. Hei hi Player's Family leh Press mite tan a ni. A hranpain hming hmerhin card siam vek a ni a, he inkhel atan bika media accreditation nei sports lam chanchin buaipuitu press mite ṭhutna tur a ni. Hetah vek hian Mizoram XI player chhungte tan ṭhutna siam a ni bawk a, midang chim buai lohna tur hmun bik pek an ni.

Official pavillion-ah pawh sawm bikte chiah an ṭhu thei. 'Special Invitee' tih inziak card siam a ni a, a rawng a sen a, chutah chuan an hming chiang taka chhut kai vek a ni. Card pakhatah mi pakhat chiah a luh theih.

District FA lama OB, MPL Club hruaitu pawimawh bikte leh sawm bik mi dangte tan card siam a ni a, card hi midangte pek chhawn chi a ni lo a, hming a inchhu vek a, card pakhatah mi pakhat bak luh a remchang lo ang. 

Card-ah hian ṭhutna tur chiang takin a inziak vek a, card en uluk a ngai dawn a ni.