Dynamo player leh coaching staff an khung hrang

May 16 aṭangin Bundesliga leh Bundesliga 2 te khelh chhunzawm an tum a, harsatna erawh ala thleng thei reng. Bundesliga 2 club Dynamo Dresden player zinga pahnih chuan Covid-19 an kai tih hmuhchhuah thar leh a ni.

Bundesliga 2 table mawngphah luahtu Dynamo Dresden player leh coaching staff zawng zawng chu ni 14 chhung khung hran an ni dawn a, league khelh ṭan hunah an inkhunghran hun hi a zo hman dawn lo.

Inrinni khan thuchhuah siamin Dynamo chuan, "Tun aṭanga ni 14 chhung chu training leh inbuatsaihna kan nei thei dawn lo," an ti. Ruahman dan chuan Dynamo hi May 17 zanah Hannover 96 nen inkhel tur an ni.

Dynamo sports manager Ralf Minge chuan, "Tu pawh kan fimkhur tlang viau, tun hnaiah phei chuan damdawi lam thiamte nen inbiakna neiin, hri laka kan fihlim theih nan hma kan la," tiin fimkhur viau mah se hri an kai tho thu a sawi; an awmzel dan turah DFB an biak tur thu a sawi bawk.

German Football Association (DFB) chuan kar hmasa khan league an khelh chhunzawm theih hun tur hi an ti chiang a, a hmunah inkhel entu awm dawn lo mah se inkhelh dawn niah chuan match pakhat atan mi 300 vel zel Covid-19 kai leh kai loh endik a ngai ṭhin dawn.

German ramah hian hri leng vangin March 13 aṭang khan football chawlh lailawk a ni. April thla laihawl aṭang khan club-te chuan training an nei leh tawh, European league lian zinga a hmasa ber ni turin khelh chhunzawm tum mah se harsatna an la tawk ve rih zel.