Chanmari an him, Police veltu Chawnpui
Honda MPL9 league round khelh zawh a ni ta a, beisei lawk ang ngeiin round tawp ber boruak a sang hle. Chawnpui FC-in Aizawl FC, Chhinga Veng leh FC Venghnuai hnung zui turin Mizoram Police FC 2-1 in an hneh a, chakna goal hi injury time minute nganaa lut a ni.
Chanmari FC-in hun pawimawhah club hlun an nihna an pholang a, league round match hnuhnung berah MPL kai thar FC Bethlehem 2-1 in an hneh. Chanmarians hi K. Malsawmkima hnuaia an vawi khat chakna a ni a, MPL khel zel turin relegation playoff an khelh a ngai dawn. Bethlehem erawh MPL season khat chauh an khel hman a, Mizoram football inelna sang ber harsatzia a taka hretu an ni.
MPL semifinal-ah Aizawl FC leh FC Venghnuai an inkhel dawn a, Chhinga Veng leh Chawnpui an inkhelh dawn. Final khel tur zawnna hi double leg a ni dawn a, first leg hi November 22-23, 2022 ah khelh a ni dawn a, second leg hi November 25-26, 2022-ah khelh a ni ang.
A hming Rinzuala
Chhinga Veng leh FC Venghnuaiin chhiarkawp dan hmangin MPL match hnuhnung ber khelh hmain semifinal an lut tih an hria a, amaherawhchu an inkhel a pawimawh tho. Inkhela chak zawkin semifinal-ah pakhatna Aizawl FC an pumpelh dawn.
Team pahnih an intluk tawk a, a tawpa danglamna thlentu chu Lalrinzuala a ni. Serchhip tlangval Rinzuala hi match thum khelh zawhah rilphir zai vangin a chawl a, thla hnih dawn a chawlh hnuah rawn kirin minute 90-naah freekick aṭangin a khung - MPL-a a goal hmasa ber a ni.
Chenna ngai loah Chawnpui
MPL ṭan hmain I Day Football-ah Mizoram Police an champion a, Lalbiaksanga Colney hoten MPL nomawi chawi an tum hle. Mahse, Police hian Sikkim Police kum 125 lawmna puala invitation tournament an hmachhawn a ngai a, round tawp berah an kim lo.
Chawnpui FC tan semifinal khel turin chak a ngai a, Police tan draw a tawk. Lalsangzuala Hmar hoten K. Vanlalhriatzuala hmangin an khung hmasa a, Khawlailung tlangval hian season ṭha tak a hmang. Police-in player ṭha ṭhahnem tak chhawr lo mah se Police zia an chhuah a, minute 12 chiah a awm tawh tihin Lalbiakhlua (Biatea) mawi zetin a 'bicyle kick' lut.
Police an ṭang tluan dawna a lan hnuah injury time minute sarih pek belh a ni a, ball-in Dina Varte kut a per avangin penatly a chawi. Chawnpui tan Lallawmsanga a rawn pen chhuak a, goal pawimawh bik a khung. Chawnpuiin an club history-a a vawi khat nan semifinal an lut a, chenna ngai lo ram an thleng. Coach Sanga leh Chawnpui hruaitute tan hlawhtlinna a ni.
Boruak sangah Chanmari
Tun season hi MPL relegation battle awm tawha a san ber ṭum ang hiala sawi theih a ni a, Bethlehem tan draw a tawk laiin Chanmari tan chak a ngai. RG Stadium-ah entu mipui pawh an ṭhahnem a, inkhel pawh a nung ṭha hle.
Bethlehemin bul an ṭan ṭha a, Lalrintluanga'n (Tutu-a) minute ruknaah goal hmahruai a khung a, Hnathial rawlthar hian tun season-ah goal li a khung. Chanmari FC-in minute li hnuah K. Roluahpuia hmangin an sut a, K. Mama tan tun season-a goal khatna chauh a ni.
First half tawp hma hretin H. Lalmuankima'n tawnhriat neih a hmang ṭangkai a, box chhungah fing taka amah vengtu Apuia pal luiin thiam takin a tlu - referee-in penalty a pe. MK-a hian a penalty hlawhchhuah hi goal-ah a chantir a, Chanmari FC 2-1 in an chak.
Chanmari hian awlsam takin hnehna an chang lo a, Bethlehem lamin hun tawp thlengin theihtawp an chhuah. FCB hian penalty ṭum hnih an beisei a, pek an ni lo ve ve. Bethlehem an vanduai a, hun rei tak vanduai tawh Chanmari hun a thleng ta zawk.