Milan club pahnih an training

Italian club lian pahnih AC Milan leh Inter Milan te chuan Zirtawpni aṭang khan training an nei ṭan leh ta. Italy hmar lam hi Covid-19 hluarna hmun a ni a, ram chhung hmun 

ṭhenkhat aiin hri leng hian nghawng a nei na.

Inter Milan chuan training an neih hma hian an player zawng zawngin hri an kai em tih enfiah a nih thu an sawi a, hri leng lakah an fimhlim vek. Milan technical director Paolo Maldini chun hun rei tak hnua training neih leh chu a boruak a danglam thu a sawi bawk.

Italy ramah hian thla hnih chuang an inkharkhip tawh, nimin tlai thleng kha chuan coronavirus kai mi 218,268 an awm a, mi 30,395 laiin an thihpui; hri kai thar hi la awm reng mah se a vanglai a pel deuh tawha ngaih a ni.

Milan captain hlui, tuna technical director ni ta Paolo Maldini chuan, "Kan fimkhur tur a ni, chutihrualin training nei loa awm reng ringawt chu kawng hrang hrang thlirin a ṭha bik chuang lo," a ti.

Lombardy hmar lamah hian hri leng a nasa hle, Italy ram pumpuia thi zat aṭanga chhutin a zatve vel lai hi helai hmun vela mi an ni hlawm. Serie A an chawlh lailawk hma pawh khan an match hnuhnung lam chu entu awm loin an lo khel tawh.

Maldini chuan, "Player-te chu group paliah ṭhenhran an ni a, sorkar thuneitu lam duh dan ang chu kan theih chin chinah kan zawm ṭha hle," tiin a sawi.

Hri leng vang hian France leh Netherlands te chuan an rama league an titawp fel tawh. Italian Football Federation (FIGC) erawhin a hnuaia club-te duhdan angin season hman zawh ngei an la tum ruh hle thung.