Thawm nei na England inlan hun a thleng

Ṭum dang ang thoin England-in World Cup-ah thawm an nei na a, an chanchin chu ngaihven hlawh pawl a ni - mahse, media-a thawm len ringawt hi champion-na a ni lo, tih chu a hrechiangtu an ni.

Three Lions hian zanin dar 6:30-ah World Cup-a an match hmasa ber chu an khel dawn a, Iran nen an intawng dawn - team pahnih player khaikhin chuan England tan awlsam taka chakna tur angin a lang a, mahse, Iran hian England hneh an châk ve zek zek tho ang, tih hriat a ṭha.

Gareth Southgate-a'n squad a puan hma hauhin Three Lions thawm a na a, squad a puan hnuah lungawi leh lungawi lo thawm hriat tur a awm zui a, a bik takin Southgate tan tun World Cup-ah pressure a na dawn.

Hetihlai hian Iran erawh pressure awm miah loin an khel dawn a, coach tawnhriat nei ṭha Carlos Queiroz-a'n a kaihhruai dawn bawk avangin chak an beisei a nih pawhin a mak lo ang.

Hei le England
Southgate-a'n ngainatu ngah lo mah se World Cup 2018-ah England chu semifinal a khelhpui a, Euro 2020-ah final a hruai thleng bawk - major tournament-a a record hi en ila, inchhuanpui tham a ni.

Mahse, tun hnaiah Three Lions hian beisei an phak lo. An match hnuhnung parukah Southgate-a naute hi an chak miah lo a, Nations League-ah phei chuan League A aṭangin B lamah an tla thla.

Southgate-a ring lotu tan chuan hlauthawng tak chunga World Cup hmuah pawh thil awm tak a ni a, hetiang boruak karah hian Three Lions defender Eric Dier chuan an pu hi a chhan tlat thung.

Dier chuan, "Kan tournament khelh hnuhnung pahniha a hnathawh kha thlir ula, mipui hian an thlir dan hi an thlak hma mah mah a ni. England hian enge a lo tih tawh hriat reng a ngai," a ti a, a pu chungah rinna a nghat lian hle.

Engtin nge?
Manchester City right back Kyle Walker chuan a kap bawr hliam vangin bul a ṭan theih a la rinawm lo a, chuti a nih chuan Newcastle United-a 'revival' thlentu Kieran Trippier chu bul ṭan tura beisei a ni - John Stones, Harry Maguire leh Luke Shaw te nen an ding hoin a rinawm.

Euro 2020-a England-in final an luh theih chhan langsar chu defensive midfield-a Kalvin Phillips leh Declan Rice inkawpfuh kha a ni. Mahse, Phillips hian City-ah khelhna hmun a chang tam tawk lo a, mipui atchilh Jude Bellingham chuan Rice a rawn kawp a nih pawhin a mak lo ang.

Tlarhmaah Harry Kane chu mal tlat tura ngaih a ni a, Premier League defender ṭha hoin ven harsa an tih hi Iranian defender tan ven a harsa dawn - amah thlawp turin Raheem Sterling, Mason Mount leh Phil Foden an awm dawn a, an ngaihtuahawm lo ang.

Aaron Ramsdale-a'n Arsenal tan season duhawm tak hmang mah se Southgate-a'n Jordan Pickford chungah rinna a nghat leh ngeiin a rinawm a, English coach tan a keeper hriatchian sa rin hi thil finthlak tak a ni ve thei tho.

Iran an ṭha em?
World Cup-ah Iran-in chhuan tham sawi tur an nei lo - mahse, zaninah England an hneh ngat chuan an hmabak hi USA leh Wales an ni dawn a, an tan last 16 luhna kawng a inhawng zau sawt ang tih a chiang a, hei vang hian thih tha nen an bei ang.

Iran hian tlarhmaa khel turin ram tan match 95-a goal 29 khung tawh Karim Ansarifard, FC Porto tana tun season match 18-a goal 13 khung tawh Mehdi Taremi leh Bayer Leverkusen striker Sardar Azmoun te an nei a, ram tana match 65-a goal 41 khung tawh Azmoun erawh hliam vangin bul a ṭan a la rinawm chiah lo.

Mual sir aṭanga goal nawr pui turin Feyenoord winger Alireza Jahanbakhsh leh Persepolis winger Vahid Amiri te an awm dawn a, Iran hian England an nawr ngam loh ring suh.

Dinamo Zagreb defender Sadegh Moharrami, ram tana match 121 khel tawh, captain Ehsan Hajsafi leh AEK Athens tana a khelhpui, full back Milad Mohammadi te pawh tawnhriat nei ṭha an ni a, England tan hna a awlsam lo ang.