Bale kan dim loh a ngai - Acosta

USA midfielder Kellyn Acosta chuan Gareth Bale dan theih dan ṭha ber chu a chunga zahngaihna lantir loh a nih thu a sawi a, Los Angeles FC-a Bale-a khelhpui mifielder chuan, "Nuam ti taka a khelh lohna tur chuan kan vil deuh chawt a ngai ang," a ti.

World Cup group B-ah USA hi Wales, England leh Iran nen an awm a, zanin dar 12:30-ah Wales nen an match hmasa ber an khel dawn - an group-ah Three Lions an awm ve avangin, team pahnih tan match hmasa bera chak nghal a ṭul.

Acosta chuan, "Bale hi chu tu nge a nih kan hre vek a, a nomawi chawi zozai pawh hi tam tak a ni. Bale kianga khelhna chance ka nei a, a nihna tak ka hre chiang.

"Hun leh hmun a neih loh nana ven chu kan tih tur a ni. Player hlauhawm tak, Wales innghahna tur a ni dawn. A nihna takah chuan kan dim loh a, kan pet deuh pawh a ngai hial ang - kan khel ve a ni, tih hriattir a ngai a, nuam ti taka kan khelhtir chuan min hrem mai ang," a ti.

Wales tan hian Bale baakah Bournemouth striker Kieffer Moore, Swansea City midfielder Joe Allen, Nottingham Forest defender Neco Williams, Ligue 1 club Rennes centre back Joe Rodon, Fulham midfielder Harry Wilson leh forward Daniel James te chu innghahna an ni dawn - Nice midfielder Aaron Ramsey pawh a la rintlak viau ang.

Kum 1958 hnua a vawi khat nan Wales hian World Cup an khel dawn a, Bale ho hian sulhnu hriat reng tlak hnutchhiah an duh dawn - mahse, zanina USA hneh phawt chu hna hmasa tur a ni.

Mahse, Wales tan hna a awlsam dawn bik lo - USA hian Borussia Dortmund forward Giovanni Reyna, Chelsea forward Christian Pulisic, Leeds United midfielder Tyler Adams & Brenden Aaronson leh AC Milan full back Sergiño Dest te ho an nei a, Wales hneh tur khawpin an ṭha tawk.