Mipui thlawpna ṭha kan mamawh - Aizawl FC coach

21st November, 2022

Vawiin tlai dar 4:30 hian Aizawl FC-in RG Stadium-ah Sudeva Delhi an hmachhawn dawn a, Mizo club hian point thum hlawhchhuah an beisei hle.

Aizawl FC coach Standly Rozario chuan, "Trau kan hmachhawn ṭumin ṭawiawmtu kan nei ṭha a, Gokulam nen pawh Mizo mipuiin min thlawp ṭha. Chak thei turin kan khel ṭha a, kan vannei tawk lo. Sudeva lakah hian point thum kan hlawhchhuah ngei kan beisei a, player-te phur taka an khelh nan mipui ṭawimawina ṭha kan mamawh a ni," tiin Vanglaini a hrilh.

Mizo club hian Trau leh Gokulam hmachhawn tawhin point khat chiah an la hlawh chhuak a, an khingpui tur Sudeva-in bul an ṭan chhe zawk. Delhi club hian Kenkre leh Neroca te an hneh lo ve ve.

Sudeva hi Japanese coach Atsushi Nakamura enkawl a ni a, ani hi J2 League-ah pawh tawnhriat ṭha tak nei a ni. Match hnih an khelh tawha an chak loh ve ve vangin dah hniam theih an ni lo. I League tawnhriat nei ṭha Nigerian forward Felix Chidi Odili bakah Japanese midfielder Kosuke Uchida leh leh Trinidadian defender Daneil Cyrus te an kawl a, team chhia an ni lo.

Nakamura chuan, "Kan dam kim a, kim takin Aizawl FC hi kan hmachhawn ang. Champion hi kan duh ber leh kan tum ber a la ni reng a, Mizo club kan hmachhawn ṭangin point hmuh ṭan kan tum. Chak tumin kan khel ang," tiin a sawi.

Sudeva-in I League atan an rilru zawng zawng an pe thei a, Mizo club erawhin MPL an thlir tel a ngai. Aizawl FC hian Sudeva an hmachhawn tukah FC Venghnuai nen semifinal an khel dawn. November 25, Zirtawpniah semifinal second leg an khel leh ang a, hemi zawh hian November 28, Thawhṭannia RoundGlass Punjab hmachhawn turin Aizawl a chhuahsan ang.

Aizawl FC coach Standly chuan, "Kan fixtures chu a hautak khawp mai, amaherawhchu engmah thlak theih a ni tawh lo a, thil awm dan hi kan pawm thiam mai a ngai. Tunah chuan Sudeva-ah chauh rilru kan pe dawn a, kan ṭhat dan ber nia kan hriatin kan khel ang. Sudeva kan hmachhawn zawhah chuan MPL kan ngaihtuah ang," tiin Vanglaini a hrilh.

November 18, Zirtawpni
Aizawl FC 0 - 1 Gokulam Kerala
GOK : Thahir Zamam 87'
Neroca 1 - 0 Sudeva Delhi
NER : Jourdaine Fletcher 62'

November 19, Inrinni
Real Kashmir 2 - 0 Rajasthan FC
REA : Moro Lamine 21'; Jerry Pulamte

Vawiin Inkhel Tur
Aizawl FC 4:30 PM Sudeva Delhi
Trau 7:00 PM Kenre