Zaninah inkhel hmuhnawm Senegal vs Netherlands

Nizanah World Cup an khel ṭan chauh a, inkhel hmuhnawm en turin min hmuak nghal nual - zanin dar 9:30-ah African champion Senegal leh Netherlands an inkhel dawn a, inkhel hmuhnawm beisei a sual lo ang.

Senegal hian hliam vangin Sadio Mane chu Qatar-ah an hruai thei lo a, a tirah squad-ah telh zet mah se Bayern Munich forward hi a inlan thei dawn lo tih a chiang zui - Senegal tan chânna a ni a, Netherlands tan lawmna a ni.

AFCON champion ni chungin Senegal hian inelna an hmachhawn dawn a, Mane hruai thei lo mah se inrintawkna nasa tak nen World Cup an hmachhawn dawn a, Netherlands tan a harsa ang.

Chutihrual chuan kum 2018 World Cup an khelh phak loh hnuah Netherlands an inlan ve leh dawn a, kum 2014-a semifinal luhpuitu coach Louis van Gaal hoa intuaithar an nih avangin Senegal laka tlawm turah an indah dawn lo.

Senegal beiseina
African champion an ni a, Senegal-in World Cup-ah a tikimtu anga tel an tum lo - World Cup khel tura an tlin khan coach Aliou Cissé chuan champion an tum thu a lo sawi daih tawh.

Cissé chuan, "Hun rei vak lo liam taah kha chuan World Cup awmzia hre turin kan kal ve a, a hnuah inzir turin kan kal a, tunah chuan nomawi chawi tumin kan kal dawn. Ka midfielder, goalkeeper leh defender te ka en a, France emaw Spain emaw awhna ka nei lo," a ti!

CAF coach of the year Cisse chuan sawi zawmin, "Brazil tana Marquinhos leh England tana John Stones a hlu ang hian Kalidou Koulibaly hi kan tan a hlu a, Hugo Lloris aia Édouard Mendy ṭhat lohna ka hmu lo. Chu inrintawkna chu ka player-te hian nei se ka duh a, 'France pawh an champion theih chuan kan champion thei ang,' tiin inhrilh ṭhin se ka duh," a ti a, a player-te chungah rinna a nghat.

Mahse, Senegal hian Mane tel loin goal khung tur an nei ṭha tawk lo a, Watford forward Ismaïla Sarr leh Marseille striker Bamba Dieng te hi player thiam pangngai tak ni mah se Mane-a 'class' nena khaikhin chi an ni lo.

Beiseina ata buaina
AFCON champion an nih lai leh, World Cup khel tura an tlin laia Senegal leh 'tuna' Senegal hi an danglam leh tawh - danglamna langsar chu Mane tel lo tur a ni a, mahse, hei chauh hi buaina a ni lo.

Hmanni lawka khawvel keeper ṭha zinga mi Mendy-a'n Chelsea-ah Spain tana khel phak lo Kepa Arrizabalaga chu tluk loin first choice a ni tawh lo a, European club liante awh rawn ṭhin Koulibaly lah Chelsea tan a khel ṭha tawk lo.

Netherlands erawhin tlarhmaah Ajax-a intuaithar mek Steven Bergwijn, ram tan match 81-a goal 42 khung tawh Memphis Depay, PSV Eindhoven striker Luuk de Jong te ho an nei a, Senegal tlarhnung ṭhiat turin an ṭha tawk.

Chutihrual chuan Senegal hian competitive match an khelh hnuhnung pariatah vawi ruk goal an chhuah lo tih hriat tel sak a ṭha.

Netherlands an ṭha
Coach rothap LVG-a'n Netherlands a tuai thar a, a duh ang taka a khelhtir theih bawk avangin European team hlauhawm pawl an ni leh tawh - Senegal hian duh thlang thei se, an match hmasa bera hmachhawn nghal hi an châk lo ang.

Tlarhnungah Liverpool thiampuipa Virgil van Dijk chu Netherlands tan ban rinawm ni turin a inpeih a, amah ringawt hi ṭhatpui tham a ni.

VVD thlawp turin Bayern defender Matthijs de Ligt, Ajax right back ṭhangduang Jurriën Timber, Inter Milan full back Denzel Dumfries, Manchester City centre back Nathan Aké te an awm bawk.

Midfield en ila, Barcelona midfielder Frenkie de Jong, Ajax midfielder Davy Klaassen leh Ajax winger Steven Berghuis te ho an awm a, Senegal tan a awlsam dawn lo.