Tour de Hmuifang-ah Mesak-a a chak

Mizoram a thirsakawr intlansiakpui ber - Tour de Hmuifangah Sihfa tlangval Mesak Vanlalvena chu Men's Elite inelnaah a chak ber.

Mountain Bike thirsakawr khalha Aizawl — Hmuifang leh Thenzawl — Hmuifang inkar, 100km a thui intlansiakah hian Mesak Vanlalvena hi darkar 4:30:01 chhungin a thleng a, lawmman Rs. 35,000 a hlawh chhuak a ni.

Master Category-ah David Rualzakhuma chak berin darkar 4:34:27 chhungin 88km a tlan thleng thung. Junior huangah Lalruatfela chu pakhatna niin, ani hian 88km a thui chu darkar 4:21:58-ah a tlan thleng a ni.

Mizoram Cycling Association (MiCA) leh Tourism Department ṭangkawpin an huaihawt, Tour de Hmuifang 2022 hi Aizawla International Tourism Mart peng pakhatah hman a ni.

Zirtawpni zingkarah Tourism Minister Robert Romawia Royte chuan Mualpui aṭangin a vai liam. Hmuifang thleng Cyclist-te an intlansiak. Thenzawl Golf Course a an riah hnuin, a tuk Inrinniah Hmuifang panin an intlansiak leh a ni.

Men's Elite a chak ber Mesak Vanlalvena hi MiCA huaihawt tlankawng thuia inelna hrang hrangah sulhnu a nei ṭha. Nikum Tour de Hmuifangah pawh khan a chak ber tawh bawk. Northeast Olympic Games, Shillong-a zawh fel takah khan Mizoram tan bronze medal a hlawh chhuak a ni.

Result Kimchang
Elite Category 100KM
1 Mesak Vanlalvena 4:30:01
2 Lalremsanga 4:40:06
3 Laldintluanga 5:02:46

Master Category 88KM
1 David Rualzakhuma 4:34:27
2 Peter Zohmingliana 4:40:52
3 Dr. Lalrinmawia 4:47:46

Junior Category 88KM
1 Lalruatfela 4:21:58
2 Vanlalruata 4:30:35
3 Malsawmdawngzela 5:03:14