Benzema tan World Cup a tawp!

Match hmasa ber an khelh hmain Karim Benzema tan chuan Qatar World Cup a zo der mai. France international striker hi training laiin a malpui a hliam, a ṭhiante aiin a haw hma hret - a hnua an thu hriat chu, a inkhel ve thei dawn lo tih a ni.

Benzema hian season hmasa khan Real Madrid chu La Liga leh Champions League nomawi a chawipui a, season duhawm hmangin 2022 Ballon d'Or pawh a dawng, an ram France tan hlawhtlinna chang zui thei se tih chu a duhthusam a ni ngei ang.

French Football Federation chuan thuchhuah siamin, "Karim-a vanduaina hi kan zavaiin pawi kan ti. MRI scan aṭanga a lan danin, a malpui tihrawl a hliam, chawlhkar thum vel chu a chawlh a ngai dawn, dam leh thuai turin duhsakna kan hlan," an ti.

Benzema hian a zinkawngah a beidawn ngai loh thu leh, mahse tun ṭumah chuan a dinhmun ngaihtuahin an ram team kalsan lo thei lo a nih thu a sawi ve bawk a, an ram mipui bakah ram danga amah ṭantute tan chuan thu hriat nuam lo tak a ni ang.

Didier Deschamps-a'n a striker hmunruak hnawh khat turin November 21, Thawhṭanni (vawiin) thleng hian hun a nei, he thu buatsaih lai hian a aiawh tur koh an la nei lo, an koh belh ngei chu a ngaih a rinawm.

Kar hmasa mai khan an koh zinga mi, RB Leipzig forward Christopher Nkunku chu hliam vangin a lo inhnukdawk tawh bawk. Ani aiah hian Eintracht Frankfurt player Randal Kolo Muani an ko tawh thung.

France tlarhma laia khel turin Olivier Giroud a la awm, ani hi kum 36 mi a ni tawh a, match zawng zawnga khel tluan tur chuan a taksa in a tlin lo mai thei. Tun hnaia damkawr Manchester United forward Anthony Martial chu koh belh theih zinga mi a ni.

Coach Deschamps chuan, "Karim tan chuan World Cup khelh hi thil pawimawh leh a thil tum a ni a, a khel thei lo tur hi pawi ka tih pui takzet. Kan duh ang thlap player nei thei lo mah ila, tuna la awmte chungah hian rinna ka nghat ngam, theihtawp kan chhuah ang," a ti.

France hian hliam an ngah, an champion ṭuma player pawimawh Paul Pogba leh N'Golo Kante te bakah defender Presnel Kimpembe te an tel dawn lo. Defender ṭha Raphael Varane pawh dam hlim a ni a, a ṭhat dan berin a khel thei dawn em tih a chiang lo.

Group D-ah France hi an awm - an match hmasa ber atan November 22, Thawhlehni zan dar 12:30-ah Australia nen an inkhel ang, chumi hnuah Denmark leh Tunisa an hmachhawn chhunzawm ve leh dawn a ni.