District volleyball thiam ber Saitual

Mizoram Volleyball Association (MVA) buatsaih Inter District Volleyball Championship 2020 chu nimin khan a hmawr bawkna neih a ni a, mipa inelna lamah Saitual chuan Champhai hnehin an champion.

Siaha khawpuia inelna neiha final-ah Saitual hian season hmasa finalist Champhai chu 3-2 (18-25, 25-19, 27-25, 22-25, 16-14) a hnehin Mizoram huap inelna lianah a vawi khat nan hlawhtlinna an chang. Hmeichhe inelna huang lamah Aizawl chuan Kolasib chu 3-0 (25- 10, 25-17, 25-22) a hnehin an champion ve bawk.

Ram pum huap inelnaah hian Mizoram chhunga district 11 aṭangin team an tel kim. Saitual hian champion turin Lunglei, Mamit leh Lawngtlai lakah set hloh loa hnehna an chan hnuin, champion lai Aizawl chu semifinal-ah 3-1 in an hneh bawk.

Saitual assistant coach C. Lalbuatsaiha chuan, "District VA anga kan fehchhuahna hmasaah hlawhtlinna kan chang hi a lawmawm takzet. Team ṭha tak tak kan hmachhawn a, a tawpah kan vannei hlauh," tiin Vanglaini a hrilh.

Ruahman lawk dan chuan MVA hian March thla tawp aṭangin hian club inelna lian Pro Volleyball League (PVL) chu R. Dengṭhuama Indoor Stadium, Mualpuiah a buatsaih zui leh dawn, mipa team paruk leh hmeichhe team pali an tel ang.