Rilru paukhauh a pawimawh - Thiem

Dominic Thiem chuan hri leng vanga tennis an chawl mek chu khawhar thlak a tih thu a sawi a, hun harsa a tawh lai leh insiam ṭhat a tum hunlai a nih avangin inkhelh theih loh chu hrehawm a ti hle.

Austrian tlangval hian tun hmain French Open final vawi hnih a khel tawh a, clay court lalpa Rafael Nadal a ngam lo. Kumin Australian Open-ah khan final a lut leh a, mahse world number 1 Novak Djokovic ngam loin a beiseina a thamral.

Kum 26 mi Thiem chuan, "Thawnhriat aṭanga inzir thiam hi a pawimawh, kei ngei pawh ka chak lohna leh rilru natna aṭangin thawh chhuah ka tum mek kha a ni a, chutih lai tak chuan hri leng vangin kan inkhel thei ta si lo.

"Nomawi lian tham chawi tur chuan thiam bakah huaisen a ngai tih ka hria. Grand Slam bikah hi chuan nomawi chawi tur meuh chuan rilru paukhauh a lo pawimawh takzet a ni, point khat lek tihsual neih zauh a pawizia pawh ka hre tawh," a ti.

Roger Federer, Nadal leh Djokovic ten tun hnai kum 10 chhung chu tennis an thunun hneh viau, midang tan hmun an kian meuh lo. Thiem pawh hi theihna nei sang tak a ni a, a inkhelh thiamna clay court season an hmang lo hi a tan channa nasa tak a ni thei.