Barca defender Umtiti a inhliam

Barcelona defender Samuel Umtiti chu ni hnih chauh la training hman mah se a chawn dinglam a hliam a, a chawlh chen tur erawh hriat theih a la ni rih lo.

Hri leng vanga hun rei tak an chawlh hnuah, Zirtawpni khan Barca hian Ciutat Esportiva-ah training an nei ṭan leh; Inrinni khan an chhunzawm bawk - a ni hnih ni hian Umtiti chuan hliam a tawk.

Catalan club hian training an neih zawm leh hma hian player zawng zawng chu coronavirus an kai em tih an endik hmasa vek a, hri kai an awm hriat a ni lo. Training-na hmunah hian hlawm hrang hrangah an inṭhen a, tun hma angin an inhnaihchilh rih lo.

La Liga an chawlh lailawk hma khan Barcelona hian an elpui Real Madrid lakah point hnihin hma an hruai mek, match khelh hmabak 11 an la neihah nomawi chawi theihna kawng a inhawng zau angreng hle.