Premier League Club Bihchianna Sheffield - English club zinga United inphuah hmasa ber

Football chungchang an sawi a, 'United' hming a rik chuan Manchester United a lang nghal. Chutihrualin United hming pu club lar tak tak Leeds United, Newcastle United leh West Ham United te an awm.

Amaherawhchu English football club zinga United inphuah hmasa ber chu Sheffield khaw club a ni a, March 22, 1889 khan Sheffield United Football Club tia din a ni.

Sheffield hian khawvel huapa football club lar pahnih an kawl a, Sheffield United din hma hian Sheffield Wednesday din a ni tawh - Owls hi kum 32-in 

a upa zawk.

Chutichung chuan Blades tia an koh Sheffield United hian 1892-ah Football League an zawm nghal a, 1980 chhoah kum ṭhat kum an hmang nghal. 1897–98 season-ah an champion a, 1896–97 leh 1899–1900 season-ah pahnihna an ni leh bawk.

Sheffield hi club din aṭanga kum 10-naah FA Cup-ah an champion a, hemi hnu hian vawi thum 1901–02, 1914–15, 1924–25 an champion leh bawk. 

Blades hian chetchhiat lai pawh an nei a, Fourth Division-ah pawh an tla thla hial. Chutihrualin 1990-91 khan First Division-ah an inpet tling a, Premier League ṭan kum pawhin an tel nghal. 

Premier League ṭan kum hian 14-na an ni a, kum hnihnaah an relegate. 2006-07 khan Premier League rawn khel leh mah se an relegate lehnghal a, tun hi an khelh leh hmasak ber a ni.

Sheffield United tan tun season hi Premier League season li an khelhna chauh a nih avangin record han nei ṭha filawr an awm lo a, chutihrualin Manchester United aṭanga an hawh Dean Henderson chanchin erawhin ngaihven a hlawh ṭhin hle.

Dean Bradley Henderson hi March 12, 1997 khan Whitehaven, England-ah a piang a, chhungkaw vantlang aṭanga khawsa niin sum lama harsatna an tawk ve fo. Kum nga a nihin Henderson hian school a kal ṭan a, infiamna lam pawh a ngaina chho a, amaherawhchu football aiin cricket a ngaina hmasa zawk.

Manchester United ṭantu chhungkua aṭangin a sei lian a, a nu leh pa ten football tui tura duhin Man Utd jersey an hak tir ṭhin avangin Henderson-a'n cricket aia football a thlang ta zawk hi a mak lo.

Kum 2005 khan Carlisle United academy tan a trial a, an in awmna aṭanga minute 55 kal chauh a nih avangin kum riat mi tan chuan a thlanawm hle. Kum ruk a inzir hnuah Manchester United a zawm a, hma pawh a sawn hle. 2014-15 season-ah phei chuan Jimmy Murphy Young Player of the Year la thei zingah a tel a, Axel Tuanzebe a tluk ta lo.

Henderson hian khelhna hmun duhin club hrang hrangah a kal kual a, Sheffield United-ah a hming a chher. Season liam ta khan Blades hi Premier League-ah a kai pui a, kumin Premier League-ah hming a chher lehzual. Henderson hian Premier League match 27 a khel a, record a neih ṭhat avangin David de Gea thlak tura duhtu an awm chho a, England-ah pawh Jordan Pickford thlak thei tura ngaih a nih chho hial a ni.