Venghnuai tan hun ṭha a inherchhuak dawn em? Zanin dar 7-ah Aizawl FC Vs FC Venghnuai

FC Venghnuaiin an club history-a a vawi khat nan Mizoram Premier League-ah semifinal an lut a, vawi li champion tawh Aizawl FC nen zanin dar 7:00 hian RG Stadium-ah Honda MPL9 semifnal first leg an khel dawn.

I League club Aizawl FC hian MPL9-ah Venghnuai hi ṭum hnih an hneh tawh a, Standly Rosario hote hi chiang taka pakhata an nih laiin Venghnuai erawh palina an ni. Pawn lang taka statistics thlir chuan Aizawl FC hi chak chiang sa turah a dah theih a, mahse uluk lehzuala team dinhmun thlir chuan Venghnuai tan hun ṭha a tih theih.

RG Stadium hi...
I League-ah Aizawl FC-in RG Stadium hi home match khelh nan an hmang a, he ground-ah hian tun season-ah Standly hoten competitive match an khel hnem ber. Mahse, RG Stadium hi Venghnuai aṭanga kea kal phak lek a ni.

FC Venghnuaiin entu an ngah dawn tih a chiang a, tun season chhunga ṭantu nei ṭha ber hian semifinal-ah entu an ngah lehzual ang. Chutihrualin Venghnuai ṭantute hian player an auh phur thiam loh chuan team au phurtu ni loin pressure petu an ni thei. FCV hian final thlen an duh a nih chuan supporter kaihruaitu tur an inruat a ṭul ngei ang.

Fixture hautak
Aizawl FC-in league match 14 aṭangin point 31 an hmu a, Venghnuai aiin khelh zat inangah point 11-in an hmu tam zawk. Team dinhmun thlir chuan I League club hi an chungnung zawk tih a chiang a, mahse AFC hian I League leh MPL an khelh kawp avangin tun hi Venghnuai tan hun ṭhaah a ngaih theih.

Nimin tlai khan Aizawl FC-in I League match an khel a, zaninah MPL semifinal an khel lehnghal dawn. AFC hi an squad chhah ṭha mah se ni zawna an khelh dawn avangin an ṭhat dan berin an inrem thei lo ang.

Aizawl FC coach Standly Rosario chuan, "Kan khelh hmabak zel kan thlir dawn. I League-ah team ṭha ber kan khelhtir ang a, player dinhmun a zirin MPL-ah pawh kan ṭhat dan berin kan khel ang. Champion nomawi humhim ngei kan duh," tiin Vanglaini a hrilh.

Nimin tlai khan Sudeva lakah Mizo parukin bul an ṭan a, chungte chu captain Lalchhawnkima, Lalmalsawma (Buanga), Lalramsanga, R. Lalthanmawia (Amawia), Ramdinthara (Tharpuia) leh K. Lalrinfela (Mafela) ten bul an ṭan. Semifinal-ah player pahnih khat bakin bul an ṭan nawn a rinawm lo a, Venghnuaiin Aizawl FC ṭha ber an tum dawn lo tihna a ni.

Semifinal chu...
Hriat tel atana ṭha erawh Aizawl FC squad a chhah ṭha hle. I League-a inlan ho zawng player-te hi FC Venghnuai player aiin an squad a la chhah ṭha zawk. Rindika Hmar hote tan hun ṭha ni bawk mah se an dinhmun a ṭha zawk tihna a ni lo a, 50-50 ah a ngaih theih chauh zawk.

FC Venghnuai coach Rindika Hmar chuan, "Aizawl FC hmachhawn loh chu kan duh a, mahse kan hmachhawn dawn takah chuan kan inkhelh hun tur hi kan tan hun ṭha a ni. MPL-ah hneh lo mah ila I Day Footbll-ah kan hneh a, kan chak lo ṭum pawh hian danglamna thlentu chu penalty a ni," tiin I League club an hneh theih thu a sawi.

Tun season-ah Venghnuai keeper Joel B. Lalramchhana a che ṭha a, MPLU18 best keeper hi team tan a pawimawh dawn. Chutihrualin C. Ngurnuntluanga, C. Ramunpuia (Tea Chinzah), Malsawmzuala Tlangte leh Vanlalthanga te tlarhma lamah an che ṭha a, goal thum ṭheuh an khung tawh.

Venghnuai hi MPL ṭantirhah team ṭha zingah chhiar ni lo mah se tunah erawh team ṭha zingah an awm a, hun rei tak pahnihna an nih avangin Aizawl FC pawhin team dang tum an thlang zawk ngei ang. Venghnuai coach Rindika pawhin a thawhrim rah a seng a, Mizoram Santosh Trophy team enkawl tur zingah an thlang. Tunah erawh Rindika Hmar tan Santosh Trophy ngaihtuah a thiang lo a, Aizawl FC hneh chu a hna hmasa tur a ni.

Semifinal
FIRST LEG
November 22, Thawhlehni
Aizawl FC 7:00 PM FC Venghnuai
November 23, Nilaini
Chhinga Veng 7:00 PM Chawnpui FC
SECOND LEG
November 25, Zirtawpni
FC Venghnuai 7:00 PM Aizawl FC
November 26, Inrinni
Chawnpui FC 7:00 PM Chhinga Veng FC

Head to Head
I Day Football
Aizawl FC 1 - 3 FC Venghnuai
AFC : MS Dawngliana 41'
FCV : Lalrammuanpuia 13', 35'; Lalruatfela (RF-a) 77'
MPL9
Round 6 - October 14, Zirtawpni
Aizawl FC 2 - 1 FC Venghnuai
AFC : Lalchhawnkima 64'(P), 90+2' (P)
FCV : Malsawmzela 21'
MoM : K. Lalrinfela, AFC
Round 9 - October 25, Ningani
FC Venghnuai 0 - 2 Aizawl FC
AFC: Lalchhawnkima 25'(P); Lalthankima 90'
MoM: Lalmuanawma (Munez), AFC

Away Goal Rule a awm lo
MPL9 Handbook-ah chuan, "Semi final-ah hian inkhelh vawi hniha goal thun hnem zawk hi chak zawka puan tur a ni a, 'away goal rule' hman a ni lo ang. Ṭum hnih an inkhelh hnua an inhnehtawk a nih chuan penalty shootout hmanga chak zawk zawn a ni ang," tiin a inziak.

Mizoram Police-in quarterfinal an lut
Sikkim Police Invitation Tournament-ah Miozram Police chuan nimin khan Odhisa Police hnehin quarterfinal an lut. Inelna hi Tashi Namgyal Academy, Gangtok-ah neih a ni a, Mizoram hian November 23, Nilaini hian Meghalaya leh West Bengal inkhela chak zawk an hmachhawn ang.

Nimin inkhelah hian Mizoram Police tan Malsawmfela, Zaithanmawia leh Lalhmunmawia ten goal khat ṭheuh an khung a, Odisha 3-0 in an hneh. Police coach Lalbiaksanga Colney chuan, "Sikkim-ah inkhelh a ngai ta si a, MPL champion theihna hun ṭha kan bawhpelh phah. MPL-a beisei tur kan neih tak loh avangin Sikkim-ah kan ngaihtuahna zawng zawng kan seng thei dawn a, champion nomawi rawn hawn ngei kan tum ang," tiin Vanglaini a hrilh.

Mizoram Police hian I Day Football final-ah Aizawl FC hnehin an champion a, MPL-ah round 13 chhung a sang paliah awm mah se match hnuhnung berah kim loin Chawnpui FC an hneh lo a, panganaah an tlak thlak avangin semifinal an khel phak ta lo.