Argentina hmaah Saudi Arabia Messi tan World Cup hnuhnung
Lionel Messi tan World Cup hnuhnung ber a ni dawn a, player ropui leh danglam bik hian a football zinkawng tifamkim turin World Cup chawi a duh, amah tluk zetin Argentina mipui leh a khelhpui ten an duhsak, thawnthu bul chu an ziak ṭan dawn.
Vawiin tlai dar 3:30 hian Argentina chuan Qatar World Cup an match hmasa ber atan Saudi Arabia an hmachhawn dawn, an player neih dan leh sulhnu chhutin South American ram hi chak zawk tura rinkai an ni.
An phur
Argentina coach Lionel Scaloni chuan, "Eng emawni riau hi a awm, kan phur tluk zetin thlamuanna kan nei," tiin a sawi a, a naute hi tun hnaiah an khel ṭha em em a, inrintawkna sang tak nen World Cup an khel dawn.
La Albiceleste hi tun hnaiah match 35 chhung tlawm nei loa kaltluang lai an ni, an ram record a ni a, khawvel huapa record ding lai tluk turin match hnih an la hmabak, group match bika an tlawm loh chuan record an siam thei dawn tihna a ni.
Tun hma deuh kha chuan, an tlarhnung a ṭha tawk lo, tiin Argentina ṭhat tawk lohna lai an sawi ṭhin, hei hi dik pawh a dik. Tunah erawh Scaloni-a'n tlarhnung a remphui ta viau a, tun hma aia beisei an nei sang pawh hi a mak lo.
Tlarhnung laiah Nicolas Otamendi leh Cristian Romero te an nei a, season hmang ṭha tak Lisandro Martinez a la awm bawk. Manchester United defender hi a pumrua lian lo mah se tharum hman tamna Premier League-ah pawh defender langsar a ni phak.
Arsenal tana khelhna chang lo, inkhelh tam duh vanga Aston Villa pantu Emiliano Martínez chu si ban nghaktu a ni dawn. Ani hi Copa America an champion theih chhan langsar tak kha a ni, nalh vak lo leh harsa deuh pawhin a dang leh khut ṭhin.
A hma lam
Tlarhma lamah chuan captain Messi a awm a, midang chu amah pui bawmtu an ni leh ang. Copa America final-a goal awmchhun khungtu Angel di Maria dam hi Argentina tan lawmna tur a ni, Juve forward hian UAE an sawp ṭumin goal hnih hmangin a dam tih a lantir.
Di Maria hi mual sir lamah a hlauhawm leh dawn, a tlan chakna leh ball thiamna chu Argentina hmanraw ṭangkai a ni leh ang. Tournament an khelh hnuhnung ang chuan, tlarhma laiah Lautaro Martínez awmin a sir lehlamah Messi a awm thung ang.
Midfielder rinrawl Rodrigo De Paul-a'n season a hmang ṭha tawk lo, mahse Atletico Madrid midfielder hi ram tana a inlan chuan player dang daih ang mai a ni, vawiin tlaiah chuan midfield khaikhawmtu a ni leh dawn a, a kutah thui tak an innghatin a rinawm.
Poland vs Mexico
Group C-ah Argentina rinkai an ni a, chutihrualin chesual thei an ni ve tho. Zan dar 9:30-ah Mexico leh Poland an inkhel dawn, anni pahnih hi last 16 luh tum ngam tur an ni a, ram pahnih inkhela chak zawk tan kawng a inhawng dawn.
Poland hian Robert Lewan-dowski an nei, striker mal tlat tur chuan ani aia ṭha hi khawvelah an awm chuang lo. Lewy bak hming langsar an ngah lo, si ban nghak Wojciech Szczesny erawh thlamuanpui tham a ni ve tho bawk.
Mexico hi team hmuhnawm an ni ṭhin a, tun ṭumah pawh an nih leh a rinawm. Ram tana goal 29 khung tawh Raul Jimenez an nei a, ani hi Poland tlarhnung su hawng turin a ṭha tawk, an khingpui tur ang bawkin an striker bakah Guillermo Ochoa an nei.
Kum 37 mi Guillermo Ochoa hi club inelna lamah chuan a langsar vut lo a ni mai thei, inelna lian World Cup-ah erawh player hmuhnawm zinga mi a ni phak ṭhin, zaninah pawh Mizo ten kan hmelhriat keeper danglam tak kha hmuh tur a awm leh dawn.
Group C
November 22, Thawhlehni
Argentina 03:30 PM Saudi Arabia
Mexico 9:30 PM Poland