Naupang League team enkawltute inhmukhawm

Mizoram Football Association leh Reliance Foundation Young Champs buatsaih Naupang League-a team 12 enkawltu te, Reliance Foundation Young Champs leh MFA hruaitute chu nimin khan MFA Office-ah an inhmu khawm.

RFYC hotupa Yash Patel chuan, "Kan thil kalpui tur hi India rama la awm ngai lo, a vawi khatna atana kalpui a nih avangin harsatna tam tak a awm dâwn tih kan hria a, chutih rualin kan kalpui ṭhat phawt chuan Indian football thlak danglam theitu tura kan beisei a ni a, chumi thlentir thei tur chuan Mizo naupangte leh MFA hi kan ring tawk a ni, " a ti.

Ruahman dan chuan kum 13 hnuai lam naupangte hi season khatah round 33 an inkhel kual chhuak dâwn a, hei bakah hian kar khatah ni hnih aia tlem lo tlai lamah football zirna kalpui a ni ang.

MFA honorary secretary Lalnghinglova Hmar pawhin thu sawiin, "Hetiang ang project lianah hian sum sen ngai dawn se, naupang pakhat tan cheng sing chuang sen a ngai ang. Chuvang chuan kan vanneihzia hria ila, a laklawha chawlhsan a thiang lo. Engkim mai kan tana ṭha turin a thlawnin min pe a, nakkum May thleng mar pata kan kal a ngai a, team enkawlte leh nu leh pa inpekna tak tak a ngai dawn a ni," a ti a, Mizote thil thenkhatah kan teirei peih loh fo avangin tun hi inzirna hun ṭha a ni a, a tawp kan thlen ngei ngei a ngai a ni, tiin team enkawltute a fuih bawk.

Naupang League-a sensote hi RYC lamin an tumsak vek a, naupangte hian jersey, mawza leh shin guard bakah tuipaina an dawng a, inkhelh niin ei tur an dawng bawk.

Player ṭha thlan chhuahte chu Mizoramah coaching camp buatsaihsak an ni dâwn a, season tawpah a tiṭha zualte tán RYC hmunpui Mumbai-ah an inzir zelna tur ruahman a ni ang.

He project hnuaiah hian coach education leh referee education programme a awm tel dâwn a; Aizawla kalpui ang chiah hi Champhai lamah kalpui a ni ang a, Lunglei leh Kolasib-ah kalphung her danglam hretin bul an ṭan ve bawk ang.

Vawiin lamah Mizorama coach-te training pe turin RFYC Head of Youth Sandro Salami leh Head of Scouting Stephen Charles-te Aizawl an lo thleng bawk a ni.