ATP Finals champion Djokovic

Novak Djokovic chu a thiam ho zinga thiam ber a ni leh ta. Serbian star hian Casper Ruud hnehin ATP Finals title a la a, a thiam zual pariat inelnaah hian vawi ruk a champion tling ta chiah, record nei ṭha ber Roger Federer a nih rual.

Pathianni zana final inkhelah, seeded pasarihna Djokovic hian Casper Ruud chu 7-5, 6-3 in a hneh. ATP Finals bikah chuan kum 2015 hnua a champion lehna hmasa a ni a, a tan season harsa a nih avangin kumina a champion leh hi a lawmawm ang.

Kum 35 mi Djokovic hian Covid-19 laka invenna vaccine a la duh lo, hei vang hian Australian Open a khel thei lo a, United States-ah pawh a zin lut thei lo. US Open bakah Canada rama Masters an khelh ho a hmachhawn thei lo a ni.

World number 1 hlui Djokovic chuan, "Season ka hman dan zawng zawng ka chhut kir a, ka tan chuan tun tournament nomawi chawi hi a hlu zual hle. Ka khelh dan leh kawng zawh chhoh dan zawng zawng a lawmawm vek.

"Season bul ka ṭan ve thei lo a, a tawp lamah ka zin ve thei lo bawk. Khangte avang khan ka tan chuan khelh dan phung pangngai neih let kha a harsa hle, a tawpah chuan inbuktawk takin ka khel thei ta niah ka ngai," a ti.

Tennis season an hmang zo dawn hnai, nakkum January thla aṭangin season thar an hmang leh ang. Grand Slam hmasa ber Australian Open-ah Djokovic a inlan thei dawn tih a chiang tawh a, a tan chuan kum thar a nghahhlehawm zual ang.

Chak lo Ruud hi a vanduai, season kal laiah French Open leh US Open final a lut a, tunah ATP Finals-ah a ṭha zual pahnih zingah a tel leh a, amaherawhchu heng inelna ngaihhlut pathumah hian a champion lo vek.

Norway tlangval chuan, "Season tluanin theihtawp ka chhuah a, ka duh leh beisei ang thlapin hlawhtling lo mah ila number 3 ni chungin kum tawp ka hmang dawn, nakkumah chuan tun aia ṭha zawkin inlan ka tum ang," tiin a sawi.