F1 2022 season leh Sebastian Vettel an her liam ta

Car intlansiakna sang leh nghaihhlut ber - Formula 1 season kal lai chu Pathianni zan khan an tlan zo, world champion vawi li ni tawh Sebastian Vettel chuan intlansiak khawvel a mangṭha a, a tan hun hnuhnung a ni.

Abu Dhabi Grand Prix-ah Formula 1 champion Max Verstappen chu a hmasa ber aṭanga tlan chhuakin pakhatna a ni leh a, a hnungah Ferrari driver Charles Leclerc leh amah ang bawka Red Bull car khalhtu Sergio Perez te an thleng.

F1 intlansiak a hmachhawn hnuhnung berah, sulhnu nei ṭha Vettel hi 10-naah thlengin point khat a hlawh chhuak a, a tan chuan inelna hnuhnung bera point hmuh theih kha thil lawmawm tak a ni ngei ang tih a chiang.

Red Bull leh Ferrari car khalh tawh, a hun hnuhnunga Aston Martin car khalhtu Vettel chuan, "Engkim mai kha a ruak huai ni berin ka hria a, awmdan thiam pawh a harsa khawp mai. Tun hnai kum hnuhnung chu hun harsa ka tawng, mahse hringnuna zirlai pawimawh tak a ni ve tho.

"Ka tan chuan ka elpui driver dangten ui tak chunga min thlah hi a lawmawm a, hei aia hlu a awm thei tawh chuang lo ang. Formula 1 ka chenchilh chhungin hun hlimawm leh hriatreng tur ka tawng hnem, theihnghilh tawh ngai loh tur pawh ka ngah hle.

"Tunah chuan, car intlansiakna sang ber zahawmna leh ropuina hi driver dangte hnenah ka hlan chhawng tawh dawn a, anni hian kei aia nasain an chawi sang ngei ang tih ka chiang," tiin a sawi a, a tan F1 kalsan chu thil khawhar thlak tak a ni ngei ang.

Vettel a liam rual hian lal thar a piang fel tawh, season hmasa leh tun season champion ni kawp thei Verstappen chungah beiseina a sang, ani hian kuminah vawi 15 ngawt hnehna a chang thei a, season khata chak hnem record hmasa (13 wins) a khum chiang hle.

Lewis Hamilton tan erawh kum ṭha lo tak a ni thung, intlansiak hnuhnung berah hian lap thum chauh tlan hmabak awmah palina a ni mek a, mahse a tlan chhunzawm ve thei ta lo - F1 a luhchilh hnuah chak nei loa season a hman zawh hmasak ber a ni hial.