Watford-in 'neutral venue' rawtna pawm lo Premier League hmalam hun hriatthiam a har

Watford chuan Brighton & Hove Albion leh Aston Villa hnuhnung zuiin Covid-19 buaina kara Premeir League khelh leh theih dan tura rawtna 'neutral venue'-a inelna neih a pawm lo tih mipui hriatah an puangzar. Hornets chairman leh chief executive Scott Duxbury chuan inelna dik leh inpumkhatna a lak bo ṭhen thu a sawi.

Vawiin hian Premier League meeting a awm dawn a, neutral venue chungchang erawh May thla chawhnu lamah an sawi chauh a rinawm. Meeting-ah hian player contract pawhsei chungchang sawi tura ngaih a ni a, inelna ṭan tur hian khelmualah tih tur a la tam hle.

Sorkar lamin karleh lam hian security leh khelmual himna chungchanga club zawm tur dan chungchang an tihchhuah hman beisei a ni a, hemi chungchang pawh hi khel tham fe a la awm dawn a ni.

Watford chairman leh chief executive Scott Duxbury chuan, "Tun dinhmunah chuan sawi kher ngai loin stadium-ah entu an awm thei dawn lo tih hi chu hriat sa a ni a, kan pawm thlap.

"Amaherawhchu kan mual Vicarage Road hi kan bel em em a, kan hamṭhatna tur a bo tur hi kan pawm thei lo. Khawvel hmun dang ang thoin kan player-te nun dan a inthlak vek a, khawtlangin buaina an la tawh mek laia engmah thleng lo ang maia inelna ṭan hi hi thil dik a ni thei lo

"Club medical staff-te'n an la hmachhawn ngai loh an tawng chho dawn a ni a, thutlukna leh dan hi thiamna hmanga zirchian phawt ni loin ngaihruatna hmanga siam a ni. Kawng hrang hrangah kan inbeng hniam a, kan nunna kan thap a. Chumi hnuah inelna ṭan loh dan anga kan kal zui dawn a nih chuan keini ang club tenau tana Premier League hun chu tihtawi sakin a awm dawn.

"A dik thei em? Infiamnaa inpumkhatna a keng tel em? Ni e, a keng tel lo," tiin an ṭan chhan an ti chiang hle. 

Watford, Brighton & Hove Albion leh Aston Villa ten neutral venue-a khelh an duh loh thu a sawi chiang tawh a, Premier League dang zingah heng club pathum ngaihdan ṭawmpui an awm nuala hriat a ni bawk. 

Netherlands rama football inelna sang ber Eredivisie chu Covid-19 vangin champion awm loin an tawp a, France rama inelna sang ber Ligue 1 pawh tih tawp ni tawhin Paris Saint-Germain an champion thung.

Hetihlai karah hian league lian zawk Premeir League, Bundesliga, La Liga leh Serie A te erawh khelh chhunzawm ngei an la tum. Bundesliga phei chu May 16-ah khelh ṭan turin ruahmanna siam a ni tawh a, neutral venue-a khel loin anmahni stadium-ah ṭheuh an khel dawn.

Premeir League-ah erawh inelna khelh zo thei turin neutral venue-a khelh ngei a ṭul hmel a, League Managers Association chief executive Richard Bevan phei chuan, "Club-in neutral venue-a khelh an duh lo a nih chuan inelna khelh chhunzawm theih a beiseiawm loh," ti hialin a lo sawi tawh.

Amaherawhchu, Duxbury chuan rawtna hi a ṭawmpui lo, Watford chairman chuan, "Season ṭan hmain dan hi awm se chuan kan pawm thlap a, tunah erawh thil thlen tawh hnua dan siam chawp a ni. Club-te hian mahni ṭantute hi kan thunun thei zawk a, chuvangin mahni stadium-ah ṭheuh inkhela tel tur mi 300 vel nen him takin inelna a buatsaih theih ka ring," tiin neutral venue-a khelh kher loin inelna a zawh theih thu a sawi.

Premier League ṭan tura ngaihtuah tel ṭul tak chu player contract a ni a, inelna zawh hun thleng club-in an player-te an chelh theih a ṭul dawn. Premier League-ah ringawt June 30-a contract tawp tur player 171 an awm a, inelna hi June thla zawh hnu pawha khelh a nih chuan contract siam ṭhat a ṭul dawn.

Chelsea winger Willian leh Pedro, Manchester City midfielder David Silva, Liverpool player Adam Lallana leh Nathaniel Clyne, Newcastle midfielder Matty Longstaff, Sheffield United player John Lundstrum leh Bournemouth winger Ryan Fraser te chu a langsar a ni. A bik takin Champions League khel thei tura dinhmun la sawhnghet fel lo Blues tan vawiina player contract chungchanga vote an thlak tur hi a pawimawh dawn ang.

    Thutlukna siam ngai

    i)    Neutral Venue-ah Premier League khelh hmabak neih

    -    Club pali Watford, Brighton & Aston Villa ten an duh lo

    -    May thla chawhnu lamah vote an thlak a rinawm

    -    Rawtna tlang turin club 20 aṭangin club 14-in an duh a ngai

    ii)    Player contract pawhsei

    -    Kal dan pangngaiah June thla a zawh rualin season a tawp

    -    Season pawhsei a nih dawn chuan player contract pawhsei a ngai

    -    Vawiin Premier League meeting-ah vote an thlak ang

    -    Player ṭhenkhat June thla zawh ruala contract tawp tur an awm

    iii)    Medical lam chungchang

    -    Inelna ṭan tur chuan medical lam inkaihhruaina mumal tak a awm a ngai

    -    Professional Footballers' Association emaw League Managers Association emaw hnenah medical lam dan hi puanzar a la ni lo

    -    Medical lam inkaihhruaina a awm hma chu training pangngai neih theih a ni lo

    -    Hemi chungchangah pawh hian vote thlak a ṭul dawn