Champion France inlan hun
World Cup champion lai France chuan zanin dar 12:30 hian Australia an hmachhawn dawn, hliamin a tihbuai Les Bleus tan hna a awlsam lo mai thei, coach Didier Deschamps erawh a chet dan aṭangin a inringtawk hle tih a lang.
Zan dar 6:30-ah Denmark leh Tunisia an inkhel hmasa dawn. Group D aṭang chuan France leh Denmark te hi tlang tura rinkai an ni, mahse World Cup khel phak ram an nih hlawm avangin eng pawh thleng thei a ni, result sawi lawk ngawt theih a ni bik lo.
Deschamps inringtawk
Hliam an ngah thu sawi nawn a ngai lo, inelna hmachawn tura a hruai Christopher Nkunku leh Karim Benzema te chu hliam vangin an tel thei dawn lo hnuhnawh, striker ṭha Benzema phei chu a hmun ruak luah tur a ko lo hial.
Mi tam takin France hi ram ṭhenkhat angin, champion lai ni siin group stage paltlang lo thut thei niah an ngai. Coach Deschamps a zam lo, a zam loh chhan hi a player neih mekte a rintawk bakah, inbuatsaih thar lehna hun a awm tawh loh vang pawh a ni thei ang.
Benzema leh Nkunku awm lo mah se, tawnhriat nei ṭha Olivier Giroud, Antoine Griezmann leh Kylian Mbappe te an awm, anni pathum hi World Cup hnuhnung bera an ram champion pui tute kha an ni a, coach a thlamuang pawh hi a mak hran lo.
Tun hnaiah Germany, Spain leh Italy ten champion lai ni chungin, inelna an hmachhawn leh hmasakah group stage an paltlang lo, zanin hi France tan fiahna a ni dawn, match hmasa bera chetsual chuan last 16 luh loh theih a ni tih an inhrilh ngun viauin a rinawm.
Australia beiseina
World Cup hnuhnung berah khan France leh Australia bawk hi an match hmasa berah an inkhel. Russia rama World Cup an khelh khan a vawi khat nan video assistant referee (VAR) an hmang. VAR hmangin France lamin penalty hmuin Griezmann chuan 2-1 a an chakna goal a khung.
Australia hian thapui an thawh a, an khelh fuh ni a nih chuan France meuh pawh chelh turin theihna an nei tih a chiang. Winger pawimawh Martin Boyle dinhmun a chiang lo, ani hi a inlan lo a nih chuan a hmun ruak hnawh khah a harsa thung dawn.
France defender pawimawh Presnel Kimpembe inkhel thei lo tur hi a pawi mai thei, tlarhnung laia ding ṭhin Raphael Varane pawh damkawr chauh a la ni a, a tir aṭanga inkhel tluan turin a taksa a inpeih em, tih a la chiang lo - a inlan ngei erawh a rinawm.
Kimpembe a awm loh chuan Liverpool defender Ibrahima Konate emaw, Arsenal defender William Saliba emawin khelhna hun an nei thei ang. A tu emaw zawk zawk pawh lut ni se an ngaihtuahawm loh, chutih rualin World Cup boruak erawh a danglam dawn.
Eriksen awmna
Euro 2020 khelh laia Christian Eriksen awmdan kha kan la hre vek awm e, inkhelh laklawh laiin a lungphu a chawl a, khelmualah a tlu a nih kha. Thi tura ngaih a ni hman a, a hnuah erawh a rawn dam chhuak, tunah chuan World Cup a khel leh dawn!
Manchester United midfielder hi player thiam bik a la ni reng a, zaninah pawh Denmark innghahna a ni dawn. Kasper Hjulmand enkawl team hian Euro kha hmuhnawm takin an khel thei a, an player ṭha Eriksen ho phei chuan an hmuhnawm zual ngei ang.
Denmark coach Kasper Hjulmand chuan, "A hmasa bera kan tum tur chu group stage paltlang a ni ang, chumi hnuah a sang lam chu kan ngaihtuah chauh ang," tiin a sawi a, a naute pressure siamsak a duh lo.
Denmark tum tur Tunisia hian tun hmain World Cup vawi nga an khel tawh, vawi khat mah group stage an la pel lo, match 15 an khelh aṭangin vawi hnih chiah an chak. Qatar ramah Tunisian mi leh sa hnathawk 30,000 chuang an awm sa a, a hmuna ṭawiawmtu an nei ṭha ang.