United vangin Portugal a buai lo ang - Ronaldo

World Cup khel tura Qatar-a awm mek Cristiano Ronaldo chuan Manchester United nena an buaina chuan Portugal a nghawng loh tur thu a sawi a, "Ka duh hunah ka ṭawng chhuak mai ṭhin," a ti bawk!

Kum 37 mi Ronaldo hian tun hnaiah a club khelhna United chu na takin a sawisel a, club-in an phatsana a inngaih thu leh manager Erik ten Hag zahna a neih loh thu thlengin a sawi - TalkTV hmaa a thusawi hian Red Devils a nghawng na hle.

Premier League club hi Ronaldo chet danah an lawm lo a, an club legend hi a contract tihtawp sak tumin hma an la mek. World Cup a zawh meuh chuan kar khata £500,000 hlawhtu forward hian club dang zawm turin zalenna a nei tawh hial ang.

A hun chu tun!
Ronaldo chuan, "Ka nunah hian a hun ka tih hunah ka che mai ṭhin. Midang ngaihdan ka ngaihtuah lo a, ka duh hunah ka ṭawng chhuak ṭhin. Hun rei tak ata tawh kha player-ten min hrechiang a, ka nihna pawh an hria.

"Portugal hi hlawhtlin duh team kan ni a, kan rilru pawh kan pe hle. Ka interview khan he team boruak hi a sawi nghing lo ang," a ti a, a ṭhiante chungah rinna a nghat.

Ronaldo leh a ṭhiante hi group H-ah Ghana, Uruguay leh South Korea te nen an awm ho a, team ṭha tak vek an nih avangin a awlsam dawn lo - boruak ṭha lo dang lo neih a rem lo!

Ronaldo a inpeih
November 6 khan United-in 3-1 in Aston Villa an ngam lo a, he inkhela captain armband hrengtu Ronaldo hi he match hnuah hian dam lohna (?) avangin a inlan leh tawh lo a, mahse, World Cup khel tura a inpeih thu a sawi.

Ronaldo chuan, "Harsatna ka nei lo. Ka dam ṭha tawh a, ṭha takin training ka nei a, a ṭha thei ang bera World Cup bul ṭan turin ka inpeih a ni," a ti - Portugal hian November 24 zanah an match hmasa ber chu Ghana nen an khel ang.

Real Madrid legend chuan, "Portugal squad hian theihna sang tak kan nei a, kan champion theih ka ring. Mahse, tunah chuan Ghana nena kan inkhel tur thlir phawt a ṭul. Hnehnaa bul ṭan kan tum phawt ang," a ti.

A harsa dawn
Ronaldo-a'n Portugal chungah rinna a nghat a, "Tu nge ṭha ber chu a tawpah kan hre dawn - ka ngaihdanah chuan tun World Cup-a team ṭha ber kan ni a, mahse, chu chu khelmualah kan lantir a ngai," a ti.

Portugal tan match 191-a goal 117 khungtu Ronaldo-a'n an ram team ring viau mah se last 16 luh ringawt pawh a harsa dawn - Ghana hi team langsar vut ni lo mah se Brighton & Hove Albion wing back Tariq Lamptey, Arsenal midfielder Thomas Partey leh Athletic Bilbao forward Iñaki Williams neitu an ni a, vui liam theih an ni.

South Korea-in Son Heung-min an nei a, Wolverhampton Wanderers forward Hwang Hee-chan, Mainz attacking midfielder Lee Jae-sung leh Napoli centre back ṭha mi Kim Min-jae an nei a, World Cup-a an ṭhat ber ṭum a ni hial mai thei!

Uruguay hi
World champion vawi hnih ni tawh Uruguay an chhe ngai lo. Mahse, World Cup nomawi an chawi hi 1930 leh 1950 a ni tawh a, thawnthu hluiah an cham rei ta mah mah. Real Madrid midfielder ṭha Federico Valverde hoin bung thar kai an tum ang.

Uruguay hian engtiklai pawha an neih ṭhat ṭhin tlarhma bawk an nei ṭha leh dawn - Luis Suárez, Valencia forward Edinson Cavani leh Liverpool forward Darwin Nunez an kawl a, group stage paltlang tur khawp squad chu an nei.

Tlarhnungah Atletico Madrid defender José Giménez, Barcelona centre back Ronald Araújo leh ram tana vawi 159 inlan tawh Diego Godín te ho an la awm a, an nep lo ang tih a chiang.

Group H Fixtures
November 24, Ningani Zan
Uruguay 06:30 PM South Korea
Portugal 09:30 PM Ghana

November 28, Thawhṭanni Zan
South Korea 06:30 PM Ghana
Portugal 12:30 AM Uruguay

December 2, Zirtawpni Zan
South Korea 08:30 PM Portugal
Ghana 08:30 PM Uruguay