Ecuardor an lam, Qatar tan beisei a bo

FIFA World Cup chu Pathianni zan khan Al Bayt Stadium-ah khelh ṭan a ni a, Ecuador chuan harsatna nei loin inlena thlengtu Qatar chu 2-0 in an hneh. Felix Sanchez-a hote hi World Cup thlengtu zinga opening match-a tlawm hmasa ber an ni.

Ecuador tan West Ham forward hlui Enner Valencia a che ṭha a, Fenerbahce forward hlui hi inkhelh ṭantirhah a goal khung offside vangin pawm ni lo mah se goal hnih a khung ta tho.

Ecuador hian Netherlands (Nov 25) leh Senegal (Nov 29) an la hmachhawn dawn a, Qatar pawhin Senegal (Nov 25) leh Netherlands (Nov 29) te an la hmachhawn ang. Inelna thlengtu hian team nem bera ngaih an hneh loh avangin match khat khelh zawhah second round luh beisei a bo nghal hle.

Offside chu
Ecuador captain Valencia-a'n minute thumna lekah a tauh goal a, lawm hman viau mah se VAR hmangin goal hi pawm a ni lo.

FIFA danah chuan, "Ball chhuah laia goal venghim lam player hnung ber dawttu (second last opponent) aia goal khung tum player-in goal a hnaih zawk chuan offside tih a ni."

FIFA danah hian goalkeeper tihin a inziak lo a, chutihrualin goalkeeper hi tehfunga hman a awl avangin goalkeeper hnunga player an awm hian hrethiam lo an awm ṭhin.

Qatar goalkeeper goalkeeper Saad Al Sheeb hnungah Qatar defender Abdelkarim Hasan a awm a, keeper Al Sheeb hi second last opponet a ni chiah. Ecuador forward Michael Estrada ke chuan keeper Al Sheeb aia goalline hnaih zawk avangin Valencia goal chu offside vangin pawm a ni lo.

Valencia show
Qatar lakah Premier League-a khel tawh Valencia a langsar a, keeper Al Sheeb lakah penalty a hlawh chhuak. Kum 33 mi Valenica hian minute 16-naah cool takin penalty a khung a, goal khat satliah a ni lo - inrintawkna taka a pet avangin Ecuador hian rilruah pawh an ngam tih a lang.

Minute 31-naah right back Angelo Preciado chu vengtu nei lo Valencia-a'n a tauh goal. Ecuador-in 2-0 hma an hruai bakah inkhel an thunun bawk avangin Qatar beiseina a bo tih a lang a, second half-ah goal luh belh tawh lo mah se entu mipui chanve vel erawh inkhelh tawp hmain stadium an chhuahsan.

Beisei a bo
Qatar hian Felix Sanchez hoin thla ruk chhung World Cup atan hian an inkulh hrang a, an inbuatsaihna ṭha viau mah se an bul ṭan dan erawh mangchhia ang chauh a ni. Kum 2019 khan Qatar hian Japan hi hnehin Asian champion an ni a, inelna goal kua khugntu Almoez Ali-a'n World Cup-ah beisei a pha lo.

Kum 26 mi Ali chauh ni loin Qatar tana match 100 khel tling tawh captain Hassan Al-Haydos (169), Abdelkarim Hassan (130), Karim Boudiaf (115), Abdulaziz Hatem (107) leh Boualem Khoukhi (105) ten bul ṭan vek mah se an tawnhriat an hmang ṭangkai thei lo. Qatar hian goal zawnah a pet lo a, Ecuador keeper Hernán Galíndez tan hna an siam lo.

Qatar tan second round chauh ni loin tun World Cup-a point hmuh hrim hrim pawh a har tawh ang. Ecuador erawh bul an ṭan ṭhat avangin Netherlands emaw Senegal emaw vel theitu an ni thei thung.

FIFA World Cup 2022
November 20, Pathianni
Qatar 0 - 2 Ecuador
ECU: Enner Valencia 16' (P), 31'

Nizan Inkhel (Result kan hre hman lo)
England 06:30 PM Iran
Senegal 09:30 PM Netherlands
USA Wales 12:30 PM Wales

Vawiin Inkhel Tur
Argentina 03:30 PM Saudi Arabia
Denmark 06:30 PM Tunisia
Mexico 09:30 PM Poland
France 12:30 PM Australia

November 23, Nilaini
Morocco 03:30 PM Croatia
Germany 06:30 PM Japan
Spain 09:30 PM Costa Rica
Belgium 12:30 PM Canada

Group inṭhen dan
Group A: Qatar, Ecuador, Senegal, Netherlands
Group B: England, Iran, United States, Wales
Group C: Argentina, Saudi Arabia, Mexico, Poland
Group D: France, Australia, Denmark, Tunisia
Group E: Spain, Costa Rica, Germany, Japan
Group F: Belgium, Canada, Morocco, Croatia
Group G: Brazil, Serbia, Switzerland, Cameroon
Group H: Portugal, Ghana, Uruguay, South Korea

• Group khat aṭangin team hnihin second round an lut dawn
• Point inang hmu an awm a nih chuan goal difference en hmasak ber tur a ni