Rangers-in Van Bronckhorst an ban

Scottish club lian Rangers chuan coach Giovanni van Bronckhorst chu kum khat an inkawl hman tihin, a hna aṭangin an ban a, he thu buatsaih a nih lai hian a thlaktu tur puan a la awm lo.

Dutch coach hian Rangers dinthartu Steven Gerrard thlakin, Scottish club hi November 2021 aṭang khan a enkawl ṭan a, season hmasa khan Europa League final hruai thlengin, Scottish Cup-ah nomawi an chawi bawk.

Mahse, tun season-ah Champions League khelin, European football-a club inelna sang berah hian group stage record chhe ber an siam a, Scottish Premiership-ah point kua zetin Celtic an phak lo mek bawk - a tawpah coach-in a tuar.

Rangers chairman Douglas Park chuan, "Gio hi thla 12 chhunga rim taka a hnathawh avangin lawmthu ka hrilh a, Europa League final min hruai thlen bakah, Scottish Cup nomawi min chawipui avangin a chungah kan lawm hle.

"Mahse, vanduaithlak takin, tun hnai result hian keimahni leh Gio beisei ang a phak lo a, thutlukna harsa tak hi siam a ṭul ta a ni. Rangers chhungkua chuan a kal zelna turah duhsakna kan hlan," tiin a sawi.