Goa-in Bagan an sawp

Indian Super League-a sum hmang na ber pawl ATK Mohun Bagan an mualpho - Pathianni zan khan FC Goa chu khualmualah 3-0 in an ngam lo a, top four-ah an awm phak tawh lo!

Goa hian ATK Mohun Bagan lakah hnehna an la chang ngai lo. Mahse, Pathianni zan khan thawnthu chu her danglamin a awm a, Aibanbha Dohling, Mohamed Fares Arnaout leh Noah Wail Sadaoui ten goal khat ṭheuh khungin, Kolkata club hian a chhanletna tur an neih loh avangin an tlawm.

Bagan coach Juan Ferrando chuan, "A nihna taka sawi dawn chuan FC Goa kha keini aiin an ṭha zawk. First half-a kan khelh dan phei chu a chhe takzet a ni," a ti a, a club hlui laka an tlawm zanah chhuanlam zawn a tum lo.

Goan club tan Ayush Chhetri-a'n hmun pawimawh a chan chhunzawm zel a, Aizawl FC midfielder hlui hian Bagan lakah pawh bul a ṭan - ISL-a a season hmasa berah match ruk a khel tling ta der.

ISL hi an chawl rih zui a, Ningani zan dar 7:30-ah Odisha FC leh Chennaiyin FC intawngin, league hi an khelh chhunzawm leh chauh ang.