Neymar chunga rinna nghattu Marquinhos

Brazil centre back Marquinhos chuan Paris Saint-Germain tan pawha a khelhpui Neymar chungah rinna a nghah thu a sawi a, kum 28 mi defender chuan, "Neymar hian pressure hmachhawn dan chu a hria," a ti.

Qatar-a khelh mek World Cup-ah Brazil hi group G-ah an awm a, Serbia, Switzerland leh Cameroon te nen an awm ho - group stage hi chu harsatna awm loa paltlang mai tura ngaih an ni a, mahse, an elpuite hi team ṭha tak vek an ni tih erawh theihnghilh loh a ṭha.

Marquinhos chuan, "Neymar hi chuan thlir bik a hlawh ziah a, pressure pawh a awm reng dawn. Kum 2010-a national team-a a awm aṭangin hei hi chu a nih dan sa a ni," a ti a, a ṭhianpa chu inelna hmachhawn tura a inpeih thu a sawi.

Brazil coach Tite-a'n Roberto Firmino meuh ko lo khawpin tlarhma a nei ṭha tawkah a inngai a, a bik takin Neymar khelh ṭhat leh ṭhat loh hian Brazil thlen chin tur chu thui tak a hril ang.

Vawi nga ngawt World champion ni tawh Brazil hian tlarhmaah Barcelona forward Raphinha, Arsenal striker Gabriel Jesus, Real Madrid forward Vinícius Júnior leh Rodrygo te ho an la nei a, lungphanna tur a awm lo.

Tlarhnungah ni se, Marquinhos bakah Thiago Silva leh Éder Militão te ho an awm a, keeper-ah lah Alisson leh Ederson inkara thlan tur zawk chu coach tana luhaina tur a ni deuh mai - Tite-a'n duhthlan tur a ngah hle.

Hetihrual hian group G-a team dangte hi champion tur ema rin kai ni hlawm lo mah se, team ṭha pangngai tak vek an ni a, Brazil tan chetsual theihna tur an ni dawn.

Serbia hian tlarhmaah Fiorentina striker Luka Jovic, Premier League-a striker langsar ni phak Aleksandar Mitrovic leh Juventus forward Dusan Vlahovic te an nei a, midfield-ah lah European club liante chil tiputtu, Lazio midfielder Sergej Milinkovic-Savic an nei a, captain Dusan Tadic a la awm cheu bawk - last 16 an mitthla ang.

Switzerland hi team langsar tia sawi vul chuk tur ni ngai lo mah se an chhe ngai lo a, Arsenal innghahna Granit Xhaka, tawnhriat nei ṭha Xherdan Shaqiri, Newcastle United tana season duhawm tak hmangtu Fabian Schar leh Manchester City defender Manuel Akanji te ho an nei a, an hmuhnawm dawn.

Cameroon striker ropui ṭhin Samuel Eto'o-a'n an ram team an champion ring ber mah se a rinna ṭawmpuitu an tamin a rinawm loh a, chutihrual chuan team tum châkawm tak erawh an ni lo.

World Cup 2018-a inlan lo team hian si ban nghak turin Inter Milan keeper Andre Onana an nei a, Bayern Munich tana season duhawm tak hmangtu Eric Maxim Choupo-Moting, captain Vincent Aboubakar leh Lyon forward Karl Toko Ekambi te pawh an rin ngam dawn - team intiat tawk dan thlirin, group G hi a ngaihnawm ber pawl a ni hial thei ang.

Group G Fixtures
November 24, Ningani Zan
Switzerland 03:30 PM Cameroon
Brazil 12:30 AM Serbia
November 28, Thawhṭanni Zan
Cameroon 03:30 PM Serbia
Brazil 09:30 PM Switzerland
December 2, Zirtawpni Zan
Serbia 12:30 AM Switzerland
Cameroon 12:30 AM Brazil