UFC 249: Tony leh khawvel barakhaihtu Justin Gaethje

Infiamna khawvel reh ṭhuap karah UFC 249 chu nimin zing khan neih a ni a, Justin Gaethje chuan mixed martial arts khawvel barakhaihin Tony Ferguson chu round nganaah technical knockout hmangin a hneh. 

VyStar Veterans Memorial Arena-ah coronavirus vangin fight entu an awm thei lo a, fighter inhmachhawnte au thawm thang khawk bak hriat tur a awm lo. 

Fans au thawm hriat tur awm lo mah se Gaethje-a'n a tha a thlah dul lo a, expert-ten amah aia an dah san zawk Tony Ferguson chu a nghaisa a ni ber!

Kum 31 mi fighter hi round tinah a chungnung zawkah a ṭang a, round ngana a thlen meuh chuan referee Herb Dean chuan Tony tan fight hmachhawn zui zel chi a ni lo tih a hria a, inhnek a titawp - Gaethje chu UFC interim lightweight title pek a ni. 

Justin Gaethje-a'n Tony hnehin UFC interim lightweight title a la a, mahse 'interim' title hi a duh tak a ni lo - he kawnghren vai kiang chung hian American fighter chuan a duh ber chu kawnghren 'tak tak' a nih thu a sawi. 

UFC lightweight title kawltu Khabib Nurmagomedov a lo lang a, kum 31 mi Gaethje chu fakin, "Ka lawmpui a che, fight hmuhnawm tak min chhawpsak a ni," a ti. 

Gaethje chuan, "Khabib hi khawvela ṭha ber a ni. Fight-a hmachhawn tawh 28-ah chak loh a la nei lo a, chutiang ang taka fighter ṭha hmachhawn aia chona phurawm zawk a awm rih lo. Khabib hi hmachhawn ka duh a ni," a ti. 

MMA fight vawi 24-a hmachhawna vawi 22 chak thei fighter Gaethje hi World Series of Fighting-ah a inlan ṭhin a, May 2017 khan UFC hi a zawm ve chauh - UFC-a fight a hmachhawn hmasak pathumah vawi hnih a tlawm a, tunah erawh Tony Ferguson meuh hneha a zawna vawi li chakin Khabib a sawi ri ta. 

UFC 249-a fight ngaihven hlawh zingah 2008 Olympic wrestling gold medallist Henry Cejudo chuan UFC bantamweight title-a kawl lai chu Dominick Cruz lakah a humhim a, a chawlh thu a puang zui!

Kum 33 mi fighter hian kum 2013 khan MMA hi a luhchilh ṭan a, August 4, 2018 khan MMA fighter ropui ber pawl Demetrious 'Mighty Mouse' Johnson hnehin  UFC Flyweight Championship title a hlawh chhuak a, UFC-a a title hmasa ber a ni. 

Cejudo hian flyweight kalsana a rihna ti tamin bantamweight a luhchilh a, flyweight lama a title kawl lai chu a kalsan - June 2019 khan bantamweight-a a fight hmasa ber hmachhawnin Marlon Moraes chu technical knockout hmangin a hneh a, UFC bantamweight title-a hlawh nghal!

Pathianni zingah a kawnghren kawl lai humhimin Dominick Cruz chu technical knockout hmang bawkin a hneh a, a chawlh thu a puang ta thung - "Kum 33 mi ka ni tawh a, ka career-ah ka lawm tawk. Ka chawlh a hun ve ta a ni," tiin a sawi. 

UFC 249 hi a tirah tak chuan Barclays Center, Brooklyn, New York-ah April 18 khan neih tura tih a ni a, mahse Covid-19 hri leng vangin ruahman angin thil a kal thei lo. 

New York-ah inelna hi neih theih a ni dawn lo tih a chiang phawt a, UFC president Dana White chuan mimal thliarkarah entu awm loa kaltlangpui a nih tur thu a sawi. 

Mahse, UFC thawhpui ESPN lam inrawlhin UFC 249 hi neih loh mai an rawt a, April 9 khan White chuan Covid-19 vangin inelna chu kaltlangpui a nih theih loh tur thu a puang. 

Mahse, Florida governor Ron DeSantis chuan infiamna khawvel chu mi tam tak ei bel a nih avangin kalpui a nih theih dan turin dan a thlah dul a, mipui punkhawm erawh  la khap reng a ni - hei hi remchangah lain UFC 249 hi Florida-ah neih a ni ta a ni. 

UFC 249-ah hian a tirah chuan Khabib leh Tony hi inhmachhawn tura tih an ni a, mahse Covid-19 vangin Russia-ah Khabib a tangkhang a, inelna a hmachhawn thei lo. 

Russian fighter aia inlan turin Gaethje puan a  ni a, mi aiawhtu zawk khan khawvel barakhaihin Tony a hneh a, tunah chuan UFC fighter 'hot' ber pawl Khabib hmachhawn turin a inpuahchah ta. 

UFC 249-a inlan tur zinga sawi hmeichhe fighter Rose Namajunas chu April 8 khan an chhungkuaa mi pahnih chu Covid-19 vanga an thih avangin a lo inhnukdawk tawh bawk. 

Middleweight fight-a inlan tur Jacare Souza chu a coaching staff pahnih nen UFC 249 hma hian Covid-19 a kai tih hmuhchhuah a ni bawk a, ani pawh hi a inlan thei lo a ni.