Aizawl FC hun a thleng ta

I League-ah Aizawl FC-in ṭha takin an khel a, an phu ang result an hlawk chhuak ṭhin lo.

Nimin tlai RG Stadium inkhelah erawh Mizo club-in Sudeva Delhi lakah goal chhuah hmasa mah se 2-1 in an lehthal. Standly Rosario hoten an phu ang ngeiin point thum an hlawh chhuak.

Minute 12-na lekah Aizawl FC keeper Vikram Singh-a'n a save per ṭhat tawk loh avangin Seilenthang Lotjem-a'n Sudeva tan goal hmahruai a khung. Mizo club-in na takin an nawr a, goal chance an hlah hnem bakah crossbar pawh ṭum hnih an tih per.

Aizawl FC an vanduai reng lo a, corner kick aṭanga ball ṭha chu goal nghal lo mah se defender goal khung thiam Lalchhawnkima'n minute 26-naah siphurh a sut a, AFC captain hi man of the match-ah thlan a ni bawk.

S e c o n d h a l f - a h Aizawl FC an che ṭha chhunzawm a, minute 64-naah an khelh ṭhat rah an seng. Vei lam aṭanga R. Ramdinthara cross ṭha chu Matias Veron-a'n goal-ah a chantir.

Hun tawp lamah Aizawl FC an inthlahdah hret a, Sudeva-in an hrem thei lo. Ṭantu nei ṭha Mizo club an ṭang tluan a, point thum hlu tak an hlawh chhuak.