First leg aṭangin kan nawr nghal ang - Sanga, Chawnpui coach Zanin dar 7-ah Chhinga Veng Vs Chawnpui

Honda MPL9 semifinal hnuhnung zawk chu zanin dar 7:00 hian Chhinga Veng FC leh Chawnpui FC ten RG Stadium-ah an khel dawn. Chhingcows hi league round-ah pahnihna an ni a, Chawnpui hi pathumna niin an inthlauhna hi point khat chauh a ni.

Chawnpui coach Lalsangzuala Hmar hian Chhinga Veng hi MPL-ah a champion pui tawh a, Sanga hian thawhpui ṭhin Anand Gurung leh Lalremruata te a hmachhawn dawn. Khelmual chhung aṭanga technical area thlengin boruak a sang ang.

An intluk tawk
MPL round tawp ber khelh hmain Chhinga Vengin semifinal an tling chiang a, Chawnpui aia head to head-a an ṭhat zawk vang a ni. Amaherawhchu, thil awm dan bihchian chuan team pahnih danglamna hi 'away goal rule' a ni a, MPL dan fuh tawk loh vang a ni.

MPL league round-ah home leh away-in danglamna a neih loh avangin he dan hi ennawn ngai a ni a, MPL semifinal-a away goal rule a awm tawh lo ang chiah hian league round-ah pawh he dan hi paih bo a ṭul.

Tun season-a an intawn hmasak ṭumin Chhinga Veng 1-0 in an chak a, Chawnpui defender Ephraim Vanlalduhsaka'n an lamah a ti goal. An vawi hnih inkhelhnaah erawh Chhingcows-in pet goal hmasa mah se Chawnpuiin 2-1 in an lehthal.

Hei le, Chawnpui chu
MPL-a goal khung tam pahnih chu Malsawmfela leh MC Malsawmzuala te an ni a, Police an awm tawh loh avangin Sawmfela'n a khung belh tawh dawn lo. Siaha tlangval MC-a erawhin semifinal khelh tur a la nei a, top scorer nih theihna hun ṭha a inher chhuak.

Amaherawhchu Chawnpui coach Lalsangzuala Hmar chuan, "MC-a inhliam vangin kan chhawr theih kher pawh ka ring lo. Kan team hi thlir ila, Chhinga Veng kan champion pui lai ang hun kha kan ni lo. Kan player-te hi fimkhur taka minute 180 khel thei an ni lo a, chuvangin first leg-ah hian chak tumin theihtawp kan chhuah ang," tiin Vanglaini a hrilh a, attacking football khelh a tum.

Chawnpui hian tlarhmaah Laltlanzova, Lallawmsanga, Samuel Laltlanthanga leh Lalliansanga te an kawl a, Chhinga Veng tlarhnung tan buaina tham an tling ang. Zozoa hi Inter Village 2022-a top scorer kha niin MPL9-ah goal hnih chauh la khung mah se a hmuhnawm ṭhin hle.

MPL season chawhnu lamah erawh Melbuk tlangval LS-a a che ṭha ṭhin a, Chhinga Veng an intum hnuhnung zawkah pawh goal khungin top scorer a ni. Midfield-ah K. Vanlalhriatzuala a khel ṭha ṭhin a, man of the match-a vawi thum thlan a ni tawh. Tlarhnungah tun inelnaa defender tawnhriat nei ṭha bera chhal theih Lalrinchhana Tochhawng a awm bawk.

Chhingcows ve thung
Chhinga Vengin Chawnpui an hneh loh ṭum khan coach Anand leh Remruata ten hrehawm an ti a, dressing room pan mai loin technical area-ah an khelh dan sawi dunin hun rei tak an awm. Hei hian chiang taka a lantir chu, Sanga enkawl Chawnpui laka tlawm an duh lo.

Chhingcows hian MPL8 semifinal-ah khan coach Sanga enkawl Electric Veng chu semifinal-ah an hneh tawh lo a, tun ṭumah pawh hian boruak a tih ṭan phah sawt ang.

Chhinga Veng hi an tlarhnung an phui ṭha ṭhin a, semifinal khel zinga goalkeeper che ṭha bera chhal ngam RS Lallawmzuala an kawl a; keeper hmaah hian Abel Lalruatfela leh Lalbiakhlua te an inkawp thei bawk ang.

Tlarhmaah Lalrinzuala a rawn kir a, Serchhip tlangval hian league round hnuhnung berah goal a khung. Coach Anand Gurung chuan, "Fimkhur takin kan khel dawn a, final luh ngei kan tum. Game plan mumal tak kan nei a, Chawnpui hi hneh ngei kan tum a ni," tiin Vanglaini a hrilh.

Semifinal
FIRST LEG
Nizan Inkhel - Result kan hre hman lo
Aizawl FC 7:00 PM FC Venghnuai
November 23, Nilaini
Chhinga Veng 7:00 PM Chawnpui FC
SECOND LEG
November 25, Zirtawpni
FC Venghnuai 7:00 PM Aizawl FC
November 26, Inrinni
Chawnpui FC 7:00 PM Chhinga Veng FC

Head to Head
MPL9
Round 5 - September 28, Nilaini
Chhinga Veng FC 1 - 0 Chawnpui FC
CVFC : Ephraim Vanlalduhsaka 29' (OG)
MoM: F. Lalrohlua, CVFC
Round 8 - October 21, Zirtawpni
Chawnpui FC 2 - 1 Chhinga Veng FC
CPFC : MC Malsawmzuala 45+2'; Lallawmsanga 59'
CVFC : Vanlallawmtluanga 29'
MoM : Lallawmsanga, CPFC