Three Lions hahum ri a ring!
Khelmual pawnah chauh an thawm a na lo - a chhung lamah pawh England chu che na tak an ni! Three Lions hian Thawhṭanni zan khan tun World Cup-a an match hmasa ber an khel a, Iran chu 6-2 ngawtin an sawp.
England tan Phil Foden aia thlan Bukayo Saka chuan Gareth Southgate-a thutlukna siam chhan pholangin, goal hnih a khung a, Jude Bellingham, Marcus Rashford leh Jack Grealish ten goal khat ṭheuh an khung bawk.
Three Lions tana ngaihtuah ngai erawh goal ruk an khung zana goal hnih an chhuah chu a ni a, Iran tan Mehdi Taremi chuan goal hnih hi a khung - England tan tlarhnung inenfiah a ṭul.
England tana lawmawm erawh point thum nena World Cup bul an ṭan thei hi a ni a, an hmabakah USA leh Wales la awm mah se Iran laka an khelh dan en chuan harsa lo takin last 16 an lut thei dawn niin a lang.
A chhehvel
Qatar-a World Cup khelh turin thawm hrang hrang a nei a, ṭum dang ang bawkin England pawhin sawi an hlawh - neih inang inkawp leh mihring zalenna an ngaih pawimawhzia lantir nan Harry Kane chuan OneLove armband hren a tum.
Mahse, FIFA lamin Qatar inrelbawlna zah loa che luite chu hrem theih a nih thu an sawi a, Kane hian a sawi angin a rawn hreng ta bik lo. Hetihlai hian Iran-in an ram lama thil thleng avangin chanchin an lo nei ve bawk a, boruak dangin a chiah hneh hle.
Iran player-te chuan an hnam hla play a nih laiin an zawm duh lo a, Iran fan-te chuan hnam hla play lai tihbuai tumin an lo au bawk a, ṭenkhatin, 'Hmeichhia, hringnun leh zalenna' tih inziakna lehkha an keng a, Iran state TV chuan hnam hla play laia an player leh fan-te chet dan hi mipui hmuh duh loin, thil dang an tilang daih!
September thla khan Iranian hmeichhia Mahsa Amini chu a lu khuhna chungchanga dan bawhchhiaa puhin Police-in an la a, Police kuta a awm laia a thih avangin tun thlengin Iran-ah hian buaina a chhuak nasa hle.
A tak ram
Hetiang boruak teh nuaih karah hian ram pahnih an intawng a, Iran boss Carlos Queiroz-a'n team nem zawk an ni, tih hre chungin 5-4-1 formation hmangin tlarhnung a rawn ngai pawimawh viau - mahse, England-in Iran tlarhnung su hawng tura hun an mamawh zat chu minute 35 chauh a ni.
Borussia Dortmund rawlthar duhawm Jude Bellingham chuan Luke Shaw-a siamsak chu ṭha zetin a tauh lut a, Phil Foden aia bul ṭantir Saka chuan minute riat hnuah ṭha zetin a rawn belhchhah ve leh bawk.
Iran-in an vanduai ve bawk - goalkeeper Alireza Beiranvand chu team-mate Majid Hosseini nen an intauh fuh avangin a khel zui thei lo a, minute 20-naah lakchhuah a ngai. Iran an insiam rem hman lo. First half hun pek belh minute khatnaah Sterling chuan Kane-a siamsak chu ṭha zetin a volley a, chawlhlawk an hman meuh chuan England hian 3-0 in hma an hruai.
Khalifa International Stadium, Doha-ah Saka bawk kan hmu nawn. Minute 62-naah Arsenal forward hian English fan-te tana beiseina siam turin a ṭha tawk tih a pholang a, an goal lina a khung.
Beiseina tlem
Porto forward Taremi-a'n an mualpho lutuk tur a ngai ngam lo. Goal lina an chhuah aṭanga minute thumnaah ṭha zetin si phurh a rawn sut ṭhen a, a team fuih phur nan erawh a tawk zo lo.
Bench aṭanga luhtir Rashford chuan minute khat pawh hun a hman hmain England tan a belhchhah a, Grealish chuan minute 90-naah a khung leh bawk - hun pek belhah John Stones foul vangin Iran-in penalty an hlawh a, Taremi-a'n khung mah se mualpho zualpui khuhna chauh a tling.
England-in an match hnuhnung paruka hnehna chan nei lo chungin Qatar an pan a, sawiselna tawkin, rin kai lo mah se an match hmasa berah goal ruk an khung nghal a, Southgate a thaw huai ang!
Three Lions hian Zirtawpni zanah match an nei lehnghal dawn a, an hmachhawn tur USA-in player langsar an kawl nual avangin hna a awlsam lo ang.
Bul kan ṭan ṭha a, mahse, hmasawn zel kan la mamawh. Khati zat goal khung chungin kan chak a, hun tam zawk kan khelh dan thlir bawk chuan lawm tur kan ni. Kan theihna tak tak kan pholang - mahse, goal hnih kha chhuah lo tur kan ni a, USA kan hmachhawn hunah insiamrem a ṭul ang. - Gareth Southgate, England manager