Wales chhan chhuaktu Gareth Bale

Chuai lam pan tawha sawi Gareth Bale-a'n ram tan innghahna tlak a la ni reng tih a pholang leh ta - USA lakah hun tawp nan minute riat chiah a awm tawh tihah penalty hmangin si phurh a sut a, a team tan point khat hlu tak a hlawh chhuak.

USA-in first half-ah inkhel an thunun a, minute 36-na lekah Timothy Weah chuan goal hmahruai a khung - Tim Weah hi Liberian player ropui leh an ram president ni bawk George Weah-a fapa a ni!

Mahse, New York-a piang Tim Weah hian a pianna ram tana khelh a thlang a, a pa khelh lohna World Cup-ah inlanin, a match hmasa berah goal a khung zui.

USA-in hmahruai chung leh inkhel thunun chungin chawlhlawk an hmang a, second half a danglam thung - Kieffer Moore luh hnuah Wales an khel ṭha sawt a, Moore hi a vanneih zan ni se Ben Davies nen goal khung thei an ni.

A tawpa Wales chhanchhuaktu erawh Bale bawk a ni - Los Angeles FC tana MLS Cup chawi hlim lakah hian US defender Walker Zimmerman chuan penalty a chawi a, boruak sang karah Bale hian goal khung turin harsatna a tawk lo.

Kum 64 zet World Cup an khelh loh hnuah Wales-in khawvel ennawm ropui berah an hmel an lan leh ta a, point khat hlu tak an hlawh chhuak - Zirtawpni tlai dar 3:30-ah Iran an hmachhawn zui ang.

Wales an vannei tel a, USA an hmachhawn hnua England hmachhawn loa team nem zawk Iran an hmachhawn tur hi duh thlang thei ta se, an duhthlanna a ni hial ang - Iran laka an chak chuan last 16 luh chance a sang tawh viau dawn.