Germany leh Spain inlan hun

FIFA World Cup-ah Europe club lian pahnih Germany leh Spain te group khatah an awm. World Cup 2014 champion Germany-in zanin dar 6:30 hian Japan an hmachhawn ang a, kum 2010 champion Spain-in zanin dar 9:30-ah Costa Rica an hmachhawn bawk ang.

Germany hi World Cup hnuhnung ber khan champion lai ni chung siin mualpho takin first round-ah an tla a, group match tawp bera South Korea an hneh loh avangin table mawngphahah an awm hial.

Spain pawhin second round lut mah se inelna thlengtu Russia penalty shootout hmangin an hneh lo a, quarterfinal an thleng pha lo. Amaherawhchu Spain hian Euro 2020-ah khan semifinal an thleng a, Luis Enrique hoin beiseina sang tak an nei ang.

Flick hote
Germany-in World Cup-a an chet chhiat hnuah Euro 2020-ah beisei an pha lo a, Wembley Stadium-ah England lakah an mualpho. Die Mannschaft-in World Cup nomawi chawipuitu Joachim Low aiah hlawhtling taka Bayern Munich enkawltu Hansi Flick an lalut.

Flick hnuaiah Germany-in hma an sawn a, World Cup qualifier-ah an khingpui chiang taka hneh vekin Qatar zin turin an inpettling. Amaherawhchu Flick-a hote hi Nations League-ah beisei an pha lo a, World Cup nomawi beiseina a tlak hniam phah.

Inelna ṭan hmain friendly match-ah Oman an hmachhawn a, 1-0 in an hneh ṭawk. Germany tana harsatna belhchhah turin inhliam vangin Leroy Sane a khel thei dawn lo a, Flick-a'n a team ṭha ber a la hre lo.

Germany hian tun hma ang thoin goal khung thei bik striker a nei lo a, Timo Werner chu hliam vangin koh a ni lo. Oman laka chakna goal khungtu Niclas Füllkrug chu bul ṭan thei tur dinhmunah a ding a, kum 29 mi Fullkrug hi ram tan vawi khat chauh a inlan - rin ngam a la harsa.

Die Mannschaft tana chanchin lawmawm erawh Germany squad-ah Bayern player pasarih an awm a, rinrawl an ni hlawm. Tun ṭum inelnaah inpuahchahna hun ṭha a awm loh avangin player inhrechiang an ṭhahnem hi team dang laka an danglamna a ni thei a, rawlthar duhawm Jamal Musiala leh Youssoufa Moukoko te player hmuhnawm tur zinga mi an ni.

Germany khingpui tur Japan hian Europe-a khel player an kawl nual a, chung zingah chuan Liverpool tana khel tawh Takumi Minamino bakah Maya Yoshida, Daichi Kamada leh Kaoru Mitoma te an kawl. Minamino hian qualifier-ah goal 10 khungin assist vawi li a nei. Saudi Arabia-in Argentina an hneh thei a, Japan pawhin Germany hneh inbeiseina sang tak an neih phah ang.

Team hmuhnawm Spain
Euro 2022 thlirkir chuan Spain an hmuhnawm a, ram leh ram inelnaah club inelna ang maiin passing football an khel thei. Luis Enrique-a'n game mawi an khelh theih nan thutlukna huaisen a siam a, a club hlui Barcelona player pariat ngawt a thlang a, La Liga champion Real Madrid aṭangin pahnih chauh a thlang thung.

Enrique hian PSG defender Sergio Ramos a ko lo ngam a, result ṭha a nei lo a nih chuan pressure a ngah dawn. Mahse, pressure sanga tawnhriat nei ṭha Enrique hian squad chhah ṭha tak a nei a, tlarhmaah Ansu Fati, Ferran Torres leh Alvaro Morata te chu bul ṭan tura ngaih an ni.

Spain an ṭha tih nemnghettu chu Manchester City midfield khaipa Rodri pawhin bul a ṭan phak a rinawm lo a, Barcelona midfielder Sergio Busquets a luh a rinawm zawk. Busquets thlawp tur hian Barca player tho Gavi leh Pedri te an awm thei a, game mawi a beisei ngam ang.

Mahse, Costa Rica-in keeper ṭha Keylor Navas an kawl a, Real Madrid keeper hlui Navas hi Spain tan a hnawksak thei ang. Tlarhmaah Arsenal player hlui Joel Campbell chu an chhuanvawr tur a ni a, hei hian team pahnih inthlauhzia pholang mah se kum 30 mi Campbell hi Spain ṭahna thlen theitu a ni thung.