Belgium inlan hun a thleng ve ta

Rualkhat ṭha bik (Golden Genaration) neitu, mahse nomawi chawi thei si lo an awm, an ram hming chu Belgium a ni. Roberto Martinez enkawl team hian tunah hian World Cup nomawi an chawi lo a nih chuan, engtik hunah nge an chawi tawh chuan ang ni, tun hi an tan hun ṭha bik a ni.

Belgium hian zanin dar 12:30 hian an match hmasa ber an khel dawn, team ṭha pangngai tak Canada an hmachhawn dawn, player neih dan thlir erawh chuan Red Devils hi chak tura buk rit zawk an ni ang.

Luka Modric awmna Croatia chuan vawiin tlai dar 3:30 hian Morocco an hmachhawn hmasa dawn. Croatia tan group F aṭanga tlang tum ringawt a tawk lo, team ṭha Belgium chunga awma hmahruaitu nih a pawimawh, chuvangin chak ngei an tum dawn.

KDB awmna
World Cup inbuatsaihna match hnuhnung berah Belgium hian Egypt 2-1 in an hneh lo. World Cup champion tum hian Qatar panna ticket pawh nei phak lo an ngam lo tihna a ni a, hun tepter tawh takah an insiamṭha hman em tih chu fiah a ni dawn.

Egypt an hneh loh ṭumin Kevin De Bruyne a khel ṭha tawk lo, Manchester City midfielder hi goal nawr kawngah ṭha viau mah se a venhim lamah a ṭha tawk lo deuh, tia sawisel a ni ṭhin - Egypt lakah pawh he thu hi a danglam lo.

De Bruyne hi Belgium innghahna a ni dawn, captain armband hrengtu chu Edan Hazard ni mah se Real Madrid tan ani hi a inlan tam tawk lo, ram tan erawh player pawimawh a ni dawn tho - chutih rualin KDB chungah mawhphurhna a sang zawkin a rinawm.

KDB leh Hazard bakah Youri Tielemans an la nei, Leicester City midfielder hi through ball pe thiam bik a ni a, player harhvang Thorgan Hazard leh Yannick Carrasco te a chawm dawn, ven an harsa ve khawpin a rinawm. Romelu Lukaku erawh nimin tlai thleng khan a dinhmun a la chiang lo.

Si ban nghak turin Thibaut Courtois an nei a, ani hi chu team dang pawhin an awh rawn a ni. Tlarhnung hi an ṭhat tawk lohna lai a nih a rinawm. Vincent Kompany a chawl tawh a, inkawp tur Jan Vertonghen leh Toby Alderweireld te hi vanglai pel tawh an ni.

Canada hian Alphonso Davies an nei. Bayern Munich defender hi malpui hliam vangin tun hnaiah a buai a, zaninah a inlan a nih pawhin 100% chu a la ni lo deuh ang, player ṭha ber pawh a chian loh avangin Canada tan point khat hmuh tuma khelh a finthlak ang.

Croatia leh Modric
Russia rama World Cup an khelh khan, a tirah Croatia hi rinkai an ni lo. Mahse, Luka Modric awmna team hian final hial an thleng a, tun hma lama an chet dan ang bawkin World Cup a nih meuh chuan team hmuhnawm zinga mi an ni thei.

Real Madrid midfielder Modric-a'n an ram team hi a la ho thei dawn, an ramin World Cup an khelh vawi rukna turah hian hotupa ber a la ni leh ang, kum 37 mi a nih tawh avangin atana hun ṭha hnuhnung ber a ni tawh bawk ang.

Midfielder pawimawh ni ṭhin Ivan Rakitic a chawl tawh a, hetih lai hian Chelsea midfielder Mateo Kovacic, Tottenham winger Ivan Perisic leh Marcelo Brozovic te an la nei a, team ṭha leh hlauhawm tak chu an la ni thei dawn.

Morocco hian defender ṭha Achraf Hakimi an nei. Paris Saint Germain defender hi a tlanna hmunah chuan ani aia ṭha an tam bik lo ang, ani hi goal venhim leh a nawr thlenga ṭangkai thei tur a ni dawn a, mipui enbik pawh a ni ang.

Tlarhma lamah Hakim Ziyech an nei, Chelsea forward hian ram tana inkelh a chawlhsan zuk tawh a, mahse an ko kir. Ziyech leh Hakimi te an neih avangin mual sir lamah Morocco hi an hlauhawm dawn, tlarhma a awm tur Youssef En-Nesyri pawh ven ngun ngai bik a ni ang.

Group F
Vawiin/Zanin Inkhel Tur
Morocco 03:30 PM Croatia
Belgium 12:30 AM Canada

November 27, Pathianni
Belgium 06:30 PM Morocco
Croatia 09:30 PM Canada