A chungah Spanish player pahnih

Mipa tennis thuneitu sang ber Association of Tennis Professionals (ATP) chuan ranking thar a ti chhuak a, a chung bera leh a dawtah Spanish player pahnih Carlos Alcaraz leh Rafael Nadal te an awm.

Nadal-a'n tun season chhungin Australian Open leh French Open nomawi a chawi a, a hnam pui Alcaraz hian US Open nomawi a chawi thung. Spanish player pahnihin ranking sang ber leh a dawt hauh chunga kum tawp an hman vawi khatna tur a ni.

Grand Slam vawi 22 champion tawh Nadal hian major title la hnem ber record a chelh mek a, season tharah a dinhmun sawhngheh zual a tum ang. January thlaa khelh tur Australian Open-ah nomawi kawltu ni chungin a inlan dawn.

Nadal tan fiahna hautak a ni nghal dawn, grand slam hmasa berah hian Novak Djokovic a inlan thei tawh dawn. Kumin tir lam khan Novak hi Melbourne khawpui aṭanga thawn haw a ni a, inelna a hmachhawn thei lo.

Season tharah erawh Djokovic a inkhel thei dawn, hard court inelna lian hi a inkhelh thiamna hmun a ni, a champion a nih chuan major title lak hnem lamah Nadal a tluk dawn, kum tir aṭangin tennis boruak a nung nghal phat ang.

Serbian star Djokovic hian world number 5 ni chungin kum tawp a hmang dawn, season tir lama a hun harsa tawh dan thlir chuan a tawpna hi a chhe lo. ATP Finals champion a nih leh theih avangin inrintawkna sang tak nen a lo kir leh ngei ang.