Rangers leh Gerrard an sawi zawm

Scottish club ṭha Rangers chuan coach Giovanni van Bronckhorst an ban hnuah coach thar tur an zawng mek a, Ibrox Stadium-a kir thei zingah Aston Villa ban hlim Steven Gerrard hming sawi rik a ni.

Kum 42 mi Gerrard hian kum 2018-2021 inkar khan Rangers hi a enkawl a, 2020-21 season khan tlawm nei miah loin league nomawi a chawipui a, team dinthartu a nih bawk avangin fan-te ngainat a hlawh hle.

Mahse, Liverpool legend hian November 2021 khan Rangers hi chhuahsanin Aston Villa a pan a, English club-ah bul ṭan ṭha viau mah se beisei a phak zui loh avangin October 20, 2022 khan ban a ni.

Gerrard hi club nei loin a awm mek a, Rangers-a kir tur anga sawi rik a awm. Mahse, Scottish club ṭantu tam takin Villa a pan san avangin an la ngaidam lo ang tih a chiang a, hetihrual hian club leh players hrechiangtu a nih avangin kir tura duhtu a nei nual bawk.

England international hlui Gerrard bakah hian Michael Beale hming a ri ring viau bawk. Rangers leh Villa-a Gerrard-a assistant Beale hian June 2022 khan Gerrard kalsanin Queen Park Rangers a enkawl ṭan a, Rangers hian an dawr a nih chuan Championship club hian a kal an phal dawn nia sawi a awm.

Mahse, Beale hian Premier League club Wolverhampton Wanderers dawrna pawh thla hmasa lawk khan a lo hnar tawh a, Championship chhuahsana Scottish Premiership club enkawl a châk lutuk lo ang.

Gerrard leh Beale bakah hian Burnley boss hlui Sean Dyche, Southampton-in November thlatira an ban tak Ralph Hasenhüttl, Japanese club Yokohama F. Marinos enkawltu Kevin Muscat leh Norwegian club FK Bodø/Glimt boss Kjetil Knutsen te hming a ri bawk.