Netherlands chakna Cody Gakpo

Thawhṭanni zan khan Louis van Gaal-a kaihhruai Netherlands an inlan a, Senegal lakah chak turin harsatna tawk mah se hun tawp dawn hnaiha Cody Gakpo leh substitute Davy Klaassen te goal hmangin 2-0 in a chak.

Group A-ah Netherlands leh Ecuador ten point thum ve ve an hmu a, November 25, Zirtawpni zan dar 9:30-ah an inkhel ang. Senegal tan insiamremna hun ṭha a awm dawn a, Zirtawpni zan dar 6:30-ah team nem bera ngaih Qatar an hmachhawn thung ang.

An inhnehtawk
Senegal hi African champion ni mah se an thiampuipa Sadio Mane a tel lo a, Europe ram ṭha Netherlands buk a rit zawk. FIFA ranking thlir pawhin Senegal hi 18-na an ni a, Louis van Gaal-a hote hi pariatna an ni thung.

Al Thumama Stadium-ah Aliou Cissé kaihhruai Senegal an khel ṭha a, Oranje aiin bul an ṭan ṭha zawk. Watford winger Ismaïla Sarr ball pet chu Virgil van Dijk-a'n a tauh chhuak ṭha hle.

Team pahnih an intum tawk a, nimin tlaia Argentina leh Saudi Arabia inkhel chhiar telin tun inelna team la inkhel tawk berah an chhal theih. Netherlands pawhin goal khung theihna hun ṭha a nei a, Barcelona midfielder Frenkie de Jong-a'n a duh tui hret avangin goal-ah a pet hman lo.

A hunah Gakpo
First half ang thoin second half-ah pawh team pahnih an intluk tawk a, Van Dijk-a'n corner aṭanga ball kal goal zawnah a tauh thei lo. Senegal forward Boulaye Dia erawhin goal zawnah pet mah se Dutch keeper Andries Noppert-a'n a dang ṭha hle.

Senegal an hmuhnawm chhunzawm a, Idrissa Gueye ball pet pawh keeper Noppert-a'n a dang ṭha takzet. Mahse, minute 84-naah player che ṭha tluang lai danglamna a lang a, nipui transfer laia Manchester United nena sawi zawm Cody Gakpo-a'n ṭha takin a tauh goal.

Gakpo-a tauh luh tura ball pettu De Jong-a'n ball a pet thiam tih a pholang a, chutihrualin Chelsea keeper Edouard Mendy erawhin a hna a tlin lo. Dutch winger Gakpo hian season a hmang ṭha a, tun season-ah PSV tan goal 13 khung bakah assist vawi 17 zet a nei tawh.

Netherlands goal hmahruai khungtu Gakpo hi Europe inelna sang Premier League, Serie A, La Liga, Bundesliga, Ligue 1 leh Eredivisie-a khel player zinga goal leh assist belh khawma record nei ṭha ber a ni mek a, World Cup-ah a chet ṭhat a chhunzawm.

Senegal-in Pape Gueye hmangin siphurh an sut teuh a, Netherlands keeper Noppert a chet ṭhat avangin an him hram. Injury time-ah substitute Memphis Depay pet chu Mendy-a'n hmun hlauhawm laiah a ti per a, substitute Davy Klaasen-a'n awlsam takin a pet goal.

Netherlands khel ṭha tawk mah se result ṭha an nei a, an group-a team ṭha ber an hneh avangin second round lut turin kawng a inhawng zau hle. Senegal erawh khel ṭha viau mah se point an hlawhchhuah miau loh avangin second round lut lo thei an ni.

Player inlante
SENEGAL (4-3-3): Edouard Mendy; Youssouf Sabaly, Kalidou Koulibaly, Pape Abou Cisse, Abdou Diallo (Jakobs 62); Cheikhou Kouyate (Pape Gueye 74), Nampalys Mendy, Idrissa Gueye; Ismaila Sarr, Boulaye Dia (Dieng 69), Krepin Diatta (Jackson 74).

NETHERLANDS (5-2-3): Andries Noppert; Denzel Dumfries, Matthijs de Ligt, Virgil van Dijk, Nathan Ake, Daley Blind; Frenkie de Jong, Steven Berghuis (Koopmeiners 79); Cody Gakpo, Vincent Janssen (Depay 62), Steven Bergwijn(Klaasen 79).