Eng vangin nge hun pek belh a tam em em?

FIFA World Cup 2020 inkhel hmasa lama thil langsar tak chu hun pek belh (stoppage time) a ni a, hun pek belh a tam ṭhin hle. Match hmasa pali aṭang ringawtin minute 65 pek belh a ni a, England leh Iran inkhelh hun chhung chu minute 117 leh second 16 a ni.

England leh Iran inkhelh ṭuma hun pek belh tam chhan chu inkhelh ṭantir lamah Iran goalkeeper Alireza Beiranvand na taka a player pui nen an intauh vang a ni a, chutihrualin FIFA-in hun khawhral lui ho ven nana hun dik zawka kalpui a tum vang a ni bawk.

Inkhelh laia an chawlh ṭhinna chhan tlangpui chu inhliam vang te, VAR thutlukna nghah avang te, player inthlak vang te, goal khung lawm te, penalty te leh red card vang te a ni a, heng bakah hian player-ten hun khawhral dan an zawng ṭhin bawk.

Tun hma referee lar hmingthang ṭhin Pierluigi Collina chu FIFA referees committee chairman a ni mek. Italian pachal Collina chuan, "Russia-ah khan inkhelh laia hun hloh neih let dan kha kan ngaihtuah a, khami vang khan hun pek belh pawh minute ruk aṭanga minute riat thlengin a awm.

"Han ngaihtuah chiang ta ula. Hun chanve hmalam emaw hnu lamah emaw goal thum a luh chuan goal khung lawm vangin minute 4-5 chu an khawhral dawn," tiin hun dik zawka vawn an tum thu a sawi.

Hetia hun dik zawka vawn an tum vang hian record pawh a awm nghal. England leh Iran inkhel first half-ah khan minute 14:08 pek belh a ni a, second half-ah khan 13:08 pek belh a ni leh bawk.

USA leh Wales inkhela second half-ah khan minute 10:34 pek belh a ni a, Senegal leh Netherlands-ah minute 10:03 pek belh a ni leh bawk. Football-ah hian hun tawp lam boruak sangah goal a lut duh bik a, World Cup-ah pawh added time-a goal lut hmuhin a awm.

Mehdi Taremi chuan Iran tan minute 102:30-naah penalty aṭangin England lamah a khung. Netherlands tan Davy Klaassen chuan minute 98 leh second 17-ah goal a khung ve bawk.

Liverpool legend Jamie Carragher chuan, "Football-ah hian hun khawhral luih a tam ṭhin a, chuvangin Qatar World Cup 2022-a official-in hun ṭhahnem tak an pek belh hi ka lawm," tiin a sawi.

South American football expert Tim Vickery erawhin a thlawp lo. Vickery chuan, "Hun pek belh tam lutuk hi ka thlawp lo. Minute li chu a tawk mai a, minute kua chu a tam mah mah," tiin a thlawp loh thu a sawi thung.