MPL U18-ah Chhinga Veng an champion

Mizoram Premier League Season 6 Under 18-ah Chhinga Vengin Inrinni zan khan Lam­mual­ah Dinthar FC 4-1 a hnehin a vawi khat nan an champion. Maimawms-in final vawi nga an luhnaah goal khung hmasa mah se Chhingcows chhaih kawltu chauh a ni a, MPL aṭanga Dinthar FC an tlak avangin season tharah kumin finalist team hi an inlan dawn lo.

Final-a Chhinga Veng hma­hruaina goal khungtu C. Beithalo chu best player-ah thlan a ni a, kumin inelnaa goal khung tam ber Chhingcows player F. Lalnuntluanga (Goal 8) chu best forward-ah thlan a ni a, champion-na kawnga tha thawh hlawktu Alan Lallawmsiama chu best midfielder-ah thlan a ni bawk.

Chhinga Veng hian fair play award an dawng a, kumin hi football aṭanga chhut chuan an veng tan kum ṭha a ni. Veng leh veng inelna NECS Cup-ah Chhinga Veng hi an champion tawh a, an veng club Chhing­cows chuan MFA Super Cup leh I Day Football-ah nomawi an chawi tawh. An hmabak chu Mizoram chhung football inelnaa hlu ber Mizoram Premier League a ni a, November 30 zanah Chhinga Veng FC hian semifinal second leg-ah Chanmari FC an hmachhawn dawn a, kum 2017 hi kum ṭha bika siam tur chuan veng puma an thawhchhuah a ṭul dawn a ni.

MPL Under 18 Final
Chhinga Veng 4 - 1 Dinthar FC
CVFC : Hmingthansanga 25' (OG); C. Beithalo 36; R. Savatna Jeevan Ratna 38'; F. Lalnuntluanga 82'
DFC : Vanlalzairimawia 7'
Fair play : Chhinga Veng
Mimal Lawmmam
Best Goalkeeper : RS Lawmzuala, Dinthar FC
Best Defender : Laltlankima, Bethlehem VT
Best Midfielder : Alan Lallawmsiama, Chhinga Veng
Best Forward : F. Lalnuntluanga, Chhinga Veng
Best Player : C. Beithalo, Chhinga Veng