Anfield-ah chak zawk an awm lo

Inrinni zan Premier League inkhel hmuhnawmah Liverpool chuan Chelsea an mikhual a, goal khat ve ve khungin an inhnehtawk.

Mohamed Salah chuan a club hlui Chelsea lakah zahngaihna lantir loin goal hmahruai khung mah se, hun tawp nan minute nga chauh a awm tawh tihah Chelsea-in an chhanglet a, Willian hmangin point khat hlu tak an hlawh chhuak.

Willian-a'n minute 85-naa an si phurh sutna goal a khung hmain Jurgen Klopp-a'n Adam Lallana tlan luhtir a tum a, mah se substitution a siam tur chu tih khawtlai niin Willian-a'n goal a khung hman phah.

Klopp chuan, "Kan khelh dan phung thlak kan duh avangin substitution siam ka tum a, mah se referee-in hun min pe lo. Chuvang chuan ka thin a rim a ni," tiin a lungawi lo hle.

A hming chu Salah

Salah hian Liverpool tan Premier League-ah match 13 khelin goal 10 a khung tawh a, he thu buatsaih lai thleng hian Premier League-ah ani aia goal khung hnem an la awm rih lo.

Kum 25 mi winger hian tun season-ah match 20 khelin goal 15 a khung tawh a, 2013-14 season-a Luis Suarez (31) hnua Reds tana season khata goal khung hnem ber a ni - Salah hian hun tawp dawnah chakna goal khung theihna remchang a nei hial a, mah se Thibaut Courtois-a'n ṭha zetin a dan sak.

Klopp chuan, "Willian-a'n goal a khung hma kha chuan kan game a ṭha. Hun tam zawkah team chungnung zawk kan ni a, mah se kan duh ang result erawh kan hmu si lo. Tun aia ṭha zawk nih kan tum ang a, Chelsea laka point khat hlawhchhuah hi result chhe lutuk a ni lo e," a ti.

Conte a lawm

Chelsea-in Liverpool an tlawh hnuhnung parukah vawi hnih chiah hnehna changin vawi li an inhnehtawk a, he result hi hre mah se Antonio Conte-a'n attacking football khelh aiin defensive game khelh a thlang. Player 11 zinga pariat chu defensive khelh thiam zawk niin holding midfielder pathum Tiemoue Bakayoko, Danny Drinkwater leh N'Golo Kante a rem.

Conte chuan, "Kan result avangin kan lawm turah ka ngai a, team pahnihin a bul aṭanga a tawp thlengin ṭha takin kan khel a ni. Hah taka zin chau hlim kan nih avangin ka naute tan khelh a harsa a, a bik takin Anfield-a inkhelh chu a awlsam lo a ni," tiin an result-ah a lawm thu a sawi.