Badminton thiam ber Zotlang
Mizoram chhunga badminton inelna sang ber, 3rd Hrangbana Memorial Mizoram Badminton League-ah Zotlang Rockets chuan Southern Acers Siaha chu 3-1 a hnehin an champion.
Zirtawpni zan khan final thlir turin Electric Veng YMA Hall khat mipui an pungkhawm a, final hmuhnawm tak phochhuah a ni.
Zotlang thahrui Kiran B-a'n awlsam taka under 19 boys singles a la nghal a, men's singles 1-ah Lalbiaksanga'n amah aia ranking sang Lalhlimpuia hnehin Rockets-in 2-0 in hma an hruai nghal.
Men's singles 2-ah Akshit Mahajan-a'n Mizo shuttler-te ngam loh Kiran B rawn hnehin Siaha-in beisena an nei a, amaherawhchu men's doubles-ah BS-a leh Lalawmpuia te inkawp chuan M. Joseph leh Jimmy Lallianzuala te ṭang dun chu 9-15, 15-7, 15-12 in an lehthal a, Zotlang an champion.
Final-ah hneh loh la tawng lo Mahajan leh Lalvenhimi (Tetei) te an inlan hman lo - Siaha hoin an ban phaka awm nomawi an chawi thei lo a, 1-3 in chak lo mah se an champion teuh zia hrechiangtu chu anmahni bawk an ni ang.
Zotlang team enkawltuten final-ah risk an la a, doubles khel thiam Tuikual tlangval BS-a chu men's singles an khelhtir a, hei hi result danglamna a ni.
Zotlang Rockets player BS-a hi player of the tie bakah player of the tournament-ah thlan a ni a, doubles-a BS-a kawppui Lalawmpuia tan hun duhawm tak a ni bawk.
Champhai tlangval OP-a hian MBL season thum neih tawha champion Hlimen, Tuikual Shuttlers leh Zotlang tan khel kualin champion vek thei awm chhun a ni a. Southern Acers Siaha player Lalvenhimi (Tetei) chu most promising player-ah thlan a ni.
Final Result Kimchang
Cat Southern Acers Siaha Zotlang Rockets Results
U19 BS Lalnunhlua Kiran B 12-15, 7-15
MS1 Lalhlimpuia R. Lalbiaksanga 15-11, 11-15, 10-15
MS2 Akshit Mahajan Kiran B 15-13, 15-2
MD M. Joseph R. Lalbiaksanga 15-9, 7-15, 12-15
& Jimmy Lallianzuala & Lalawmpuia
XD Akshit Mahajan Lalawmpuia
& Lalvenhimi & F. Vanlalhriatpuii