Chakna goal khungtu Cristiano

Cristiano Ronaldo-a'n Champions League chauh ni loin La Liga-ah pawh goal a khung leh ta. Inrinni zan khan Real Madrid leh Malaga te chu minute 75-naah pawh 2-2 in an la inhnehtawk a, minute 76-naah Ronaldo-a'n chakna goal a khung.

Santiago Bernabeu-ah Real Madrid hi chak mah se match 13 khelh aṭangin point 27 chauh an hmu a, Zinedine Zidane-a hote hian an hmelma Barcelona chu match khata an khel tlem chung pawhin point sarih an pha lo.

Inkhel chu

Real-in minute 9-na lekah jersey number 9 Karim Benzema hmangin hma an hruai nghal a, Malaga-in minute 18-naah Diego Rolan hmangin an sut.

Minute 21-naah Casemiro hmangin Real-in hma hruai nawn mah se minute 58-naah Gonzalo Castro hmangin mikhualin an siphurh an sut nawn a, Los Blancos tan point hloh theihna inkhel tih a chiang nghal.

Real-in chak tumin an nawr a, Luka Modric chuan minute 74-naah penalty hlawh chhuakin Ronaldo-a'n pet chu keeper Roberto Jimenez-a'n dang mah se a per chu a pet goal chiang hle. Portugal captain hian Malaga a hmachhawn hnuhnung 17-ah goal 17 a khung.

Hnara hlit phawi

Kum 32 mi Ronaldo hian Malaga a hmachhawn hma hian league match riatah goal khat chiah a khung a, kum upat vang tiha sawi awm mah se Champions League-ah erawh match 5-ah goal 8 a khung a, Real thiampuipa hi a la tar lo.

Ronaldo-a'n La Liga-a goal a khung leh takah chuan inrintawkna a nei let leh dawn a, Real Madrid tan thu lawmawm a ni.

Inkhel dang

La Liga inkhel dangah Atletico Madrid-in khualmualah Levante 5-0 in an va luhchhuah a, Celta de Vigo-in Leganes 1-0 in an hneh a, Eibar-in Deportivo Alaves 2-1 in an hneh a, Real Betis leh Girona te 2-2 in an inhnehtawk.

Zanin hian dar 1:30 hian Espanyol leh Getafe te an inkhel ang.