Barca tana rinawm Messi

Lionel Messi chuan Barcelona tana a rinawm zia lantir nan kum 2020-21 season thleng daih contract a ziak, Catalan club tan hian a contract ziah a hmang zo a nih chuan first team tan kum 17 chhung a khel dawn tihna a ni.

Kum 30 mi Messi-a contract neih hmasa khan season thar lo awm tur tawp ruala tawp zui ve tur hi a ni a, tuna a contract ziak tur hian July khan inremna an nei tawh - amah lei chhuak duh tan chuan £626m zet sen a ngai dawn.

Ballon d'Or chawi-mawina vawi nga dawng tawh Messi hian Barcelona tan hian match 602 a khelah goal 523 khungin club tana goal khung hnem ber a ni a, kum 13 mi chauh a nih laia a zawm Spanish club tan hian La Liga nomawi pariat bakah Champions League nomawi pali a chawi tawh.

Argentina captain Messi chuan, "Kan thil tum chu hlawhtlinna chan chhunzawm a ni a, tun hma ang bawkin nomawi kan chawi chhunzawm pawh ka beisei. He club tana contract ka ziak thei hi ka lawm a, he hmuna ka hun zawng zawng hman zawh hi ka duhthusam a ni," tiin a sawi.